郭少芸昨日為處境劇《愛回家》拍外景獻上人生的第一次，因劇情講述郭少芸被高鈞賢拋棄，她希望藉玩笨豬跳釋放自己，努力重新做人。膽粗粗親身上陣玩笨豬跳的少芸，挑戰成功後坦言：「呢個第一次真係好舒暢，真係好好嘅經驗。」
郭少芸、劉丹和黎諾懿等演員昨日為無綫全新處境劇《愛回家》到澳門旅遊塔拍外景，劇情講被男友高鈞賢拋棄的郭少芸，打算藉玩笨豬跳而釋放自己，努力重新做人。
親身上陣的少芸，站在旅遊塔離地二百多米的跳台猶豫了五分鐘後一躍而下，完成後她不禁高舉勝利手勢，更獲得大家的掌聲讚許。
感覺好舒服
拍攝後少芸接受訪問，她坦言事前曾經掙扎過，她笑說：「多得高鈞賢佢飛咗我，初初有諗住唔跳，因為跟住仲要拍嘢，唔知跳完嘅狀態係點，到今日喺塔頂拍跳之前段戲，我係幾肯定我完全唔驚，望過晒周圍環境都冇問題，所以咪不如真係試吓跳，呢次係我嘅第一次。」
問到少芸會否回味第一次的經驗？她說：「成功嗰次真係好好feel，反而係失敗嗰兩次係最驚。事實上我上半身已經仆咗出去，但係下半身唔郁，導師話越拖越唔敢跳，我又諗幾十對眼望住，搞咗咁耐唔跳，真係好核突。不過聽完佢哋啲鼓勵說話後，咪叫自己go，呢個第一次真係好舒暢，真係好好嘅經驗。」
希望有改變
少芸在跳之前不時尖叫，對此她笑說：「係要好大聲釋放，咁博跳出去真係想釋放，工作人員都話跳完你個人會改變，我預期係好嘅改變，我都想感受吓，我細個認為一生人點都要跳一次，當然冇估到喺拍戲入面發生。」
採訪：何慧斯
攝影：陳俊強