沙田中文大學校園，應是本地大學中最突出，最美麗的校園。左丁山咁樣講，可能俾人笑為偏心，如果係大師級人馬咁樣講，大家要服啦。大詩人大散文家余光中有一篇名作，叫做「沙田七友記」，寫佢在中文大學教書時經常往來之七位朋友，就係宋淇、高克毅（喬志高）、蔡濯堂（思果）、陳之藩、胡金銓、劉國松，與黃維樑。寫陳之藩有如下一段：「中文大學依山面海，自成天地，沒有一條路不隨山勢迴環，沒有一扇窗不開向澄碧，之藩一見就大為動容，說：『要知道這麼美，早就來了。我去過各國的名大學，論校舍，中大平平，論校園，中大卻是一流的。』」（見劉紹銘主編，當代散文典藏之「寸心造化」余光中自選集），中大校園之美，係可以吸引名師來投嘅。
中大校園靚，花草樹木亦多，在三月份中大辦一「博群花節2012」，活動自三月八日開始，李歐梵講挫敗如何造就謙厚人生，三月十五日許鞍華講成功背後的百般歷鍊、三月二十一日白先勇講永遠的青春夢，到了三月二十九日高潮所在，於崇基未圓湖辦「博群花節」，由下午五時至七時，節目有沈祖堯校長與中大書法學會同學寫書法，潘廸華與林一峰演唱，加上音樂表演，包括戲劇「牡丹亭．遊園」，大小提琴、非洲鼓、詩歌以及賞花。
賞甚麼花？未圓湖周邊有大苞山茶、地湧金蓮、吊鐘王（紅山茶）、茶花串錢柳、銀杏，皆於三月至四月開花，未必可以睇到開花嘅就有簕杜鵑、荷花、雞蛋花、紫薇、軟枝黃蟬、龍船花等等，到時如天氣相就，校園中部范克廉樓之杜鵑盛開，每年吸引不少校外人士前來拍照。
賞花、聽歌、賞劇、聽音樂，夠晒雅趣，只望當日天朗氣清、陽光普照，氣溫有二十度以上，咁就夠晒完美。各位中大校友，中大友人，到時不妨到中大崇基一遊，踏着腳步遊湖，朗誦余光中之詩句：「春天在吐露港上喊我（原為大度山），整條光譜燦爛地喊我，紅得要戀愛，黃得拍你的眼睛，擦亮，長綠銹的舊太陽，買一個四月，買一個三月，杜鵑花在季節的裙邊，鬧成繽紛的幼稚園，春天真吵……」（余光中詩選1941-81）