捲入梁振英陣營「拉票飯局」的江湖人物「上海仔」郭永鴻，原來除跟中、港猛人熟絡外，跟娛圈中人關係亦千絲萬縷。除賈曉晨（JJ）是上海仔一手帶入娛圈外，梅小惠更是跟他一起長大的鄰居。小惠昨直認跟上海仔熟絡，她說：「就算佢係乜嘢身份，我哋都會有童年，我淨係會記得以前嗰啲。」
特首候選人梁振英核心成員與支持者劉夢熊，早前參與的流浮山拉票飯局，近日因被指有江湖人物「上海仔」郭永鴻坐鎮而引起軒然大波。據悉上海仔除認識不少中、港猛人外，原來跟娛樂圈中人亦十分熟絡，包括無綫監製梅小青及妹妹梅小惠、賈曉晨（JJ）、唐寧、黃柏高、黎小田、陳惠敏和電影製片兼導演羅守耀等，其中JJ更是由上海仔一手帶入行，梅小惠則是上海仔相識多年的鄰居。前年上海仔為亡母於紅磡世界殯儀館設靈，梅小惠也有到場致祭，而02年梅小惠為亡父在九龍殯儀館設靈，上海仔不但親到靈堂鞠躬，還緊緊握住小惠母親的手慰問，可見二人交情不淺。
「我哋係好朋友」
有傳上海仔不但是梅小惠的世交，二人還曾一度拍拖，對此小惠昨在電話中說：「梗係冇啦，上海仔係我auntie個仔，SimonKwok吖嘛，佢係我爹哋個世姪，我哋係好朋友，我冇同佢拍過拖。點解我哋會識呢，佢以前（10幾歲）成家人住喺我哋屋企樓上（旺角通菜街寶寧大廈），我哋住3樓，佢住4樓，後來佢成家人搬晒。」
小惠豈不是跟上海仔自小認識？她說：「佢唔係我嗰個年代，佢係我家姐嗰脫，我哋細個喺同一區長大，但我嗰時比較細。到我大個時爹哋唔舒服，佢再出現探我爹哋時先至再認番。爹哋走咗（02年），佢有嚟喪禮，媽咪同佢都好熟，佢好錫我媽咪，好尊敬佢。到佢媽咪走，佢仲唔俾我媽咪去，所以我同大家姐（梅小青）做代表去。」
「我尊敬嘅哥哥」
有關上海仔的家庭背境，梅小惠表示不清楚，因平時不是常與他見面，就算見面時大都是談及兒時逸事。上海仔被指是江湖中人，對他近日捲入的是非，小惠說：「除咗呢樣嘢，選特首都有好多唔同嘅新聞出現，我會選擇做好我自己，到其時邊個做特首我都會支持。我睇到佢喺港聞版出現，我都冇打電話問佢，呢啲係人哋嘅嘢、係大人嘅嘢，就算佢係乜嘢身份，我哋都會有童年，都係有以前，我淨係會記得以前嗰啲。無論乜嘢人，總有佢另外一面，大家好可能未必留意到，但我留意到。佢始終係我尊敬嘅一位哥哥，佢其他嘢我就唔會加任何意見啦。」
梅小惠姊姊梅小青昨日接受電話訪問，對於上海仔，她說：「我哋差不多同時期長大，但大咗好少來往。佢媽咪唔喺度嗰陣，我媽咪因為年紀大，所以叫我同小惠代表佢去靈堂，我哋兩姊妹仲幫手摺衣紙。好記得佢送我哋出門口時話：『我送你哋到呢度，費事喺出面俾人影相。』佢反而好關心我哋，怕我哋唔方便。其實朋友屋企人唔喺度，我哋去鞠躬，又怕乜俾人哋影相呢？」
JJ：佢對我有恩
另外，JJ於04年來港發展，獲上海仔做伯樂簽她加入他與友人合股的娛樂公司JoyStarArtisteManagementLimited，雖然該公司已結業，JJ也過檔SNAZZ，但她昨日不忘感激舊老闆說：「佢喺我嚟香港第一個老闆，永遠我都當佢係老闆，佢亦係我貴人。當年公司對我好好，幫我喺沙田租屋，又畀錢我學唱歌，雖然冇底薪，但公司幫我畀咗呢啲錢補貼，已對我好有恩。」
JJ表示效力上海仔的娛樂公司時，老闆不時請吃飯，她說：「佢好親切，對人態度好，冇架子。」JJ指過年過節必發短訊問候上海仔，對於他近日捲入黑金事件，JJ說：「我唔識政治嘅嘢，唔知講乜好，好怕講錯嘢，其實真係食餐飯啫，好少事，我真係唔明點解搞到咁大件事。」
採訪：林妃
