周中本欄熱冷選全中，運氣搭夠，也要多謝紅軍謝四向來勇往直前，補時入多球；今次仍喺重心區域英冠英超各選一場。捧富咸，返回地頭聯賽必恃勢凌人，唔怕史雲斯來訪，單W及[-1]雙注出擊；再攻「英冠甜心」殘樸，同另一護級隊布里斯托城鬥攻開冷入球「大」當熱門賭。
事實歸事實，唔能用華洋矛盾混淆視聽，鬼仔踢人事件全城嘩然，公道自在人心；我也崇洋也至愛去英國睇波，也唔會貼輸咗話自己中；輸完當自己贏喺校刊話自己贏波，然後再約賽對手大打茅波，意圖阻止自己再大敗一場？「小時了了，大時仲得了？」唔係唔畀小朋友犯錯，但大人卻恃勢恃財凌人，出律師信反噬對方，阻止真相揭露，下一代會怎樣想？香港地歪理處處見，歸錯邊也怪不得人。
廢噏一輪，周末重要戲碼喺足總盃4場8強戰，但名牌隊主場冇肉食，較看得上眼係愛華頓，上仗換了半隊吞了紅軍3蛋後，今場踢盃賽對新特蘭應見真章；但比較下，重心還是選英超富咸。主場近績好勁，常恰中下游隊，尤其前仗喺主場小屋球場大炒狼隊5球踢到曉飛，俄國中鋒普格恩耶克拍美射手丹普西有威力；上仗作客維拉落敗正常，今次迎戰上仗踢走曼城嘅史雲斯，兩隊位列中游坐穩船，後者轉場隨時打回原形。老阿法耶茲剛宣佈愛兒升做副主席，交接成功，富咸喜事一樁。冷博埋[-1]，因下周中免踢英超快車，無牽掛。
至於殘樸剛又有上季球會最佳球員、防中穆連斯走咗去雷丁；今日主場鬥布城，兩隊皆陷水深火熱，要主動出擊搶3分，入球「大」冇乜人敢吼，情況猶如外界以為紅軍對愛華頓大打穩陣波，熱捧「細」。
恃勢凌人，還有馬壇巨人大摩，明天打吡大賽此馬房出夠6駒！總獎金去到1,600萬嘅大賽抽少少篇幅講吓，4歲戰馬一生一次，各為其主，用實力評估較正路。全副精神刨波睇波，賭馬我只專拆解呢個馬房嗰幾十匹貴價馬嘅出擊手法，其他講晨操狀態、段速同血統，留番參考專業馬評家分析！6選1，我取今場評分最高分之一、又估計分頭不俗嘅「獨領風騷」，此馬去夏閹後進步驚人，可扳上二千；杜利萊有大賽騎師樣，唞成個月出擊，一W三P兼投，感受吓大賽氣氛。
下次見報(21/3)
蘋果波神
今日重心推介
熱選
樸茨茅夫大(2.1)
冷選
富咸勝[-1](3.15)