每日下課，除上網或做功課，看動畫都是小朋友每天必做事，但家長們有否想過陪細蚊仔跳出電視框框，投入大銀幕？一年一度香港國際電影節由本月21日舉行，當中不難發現很多適合孩童的電影，無論係有笑有淚溫情作、惹笑動畫或311紀錄片，都能讓小眼睛觀大世界！
記者：張文蕙
攝影：潘志恆、黃子偉
Model:Elle、Marcus、Phoebus
施晴 2歲
平時我最鍾意玩煮飯仔，煮完仲會分埋畀爸爸媽媽食，又好鍾意唱歌跳舞，最喜歡唱歌大人開心！
紀錄片 觀大世界
小朋友做功課、課外活動忙，做家長搵錢更忙！有幾多個家庭會久唔久一家大細睇電影？香港國際電影節公關經理香偉恆（Eddie）就話，只要識得揀，投入電影世界，可能令小朋友在通識科更精靈：「有啲小朋友在家睇電視時，會對動物紀錄片有興趣；今年電影節都有好多具時事性紀錄片，例如《核能國族》，就係有關311福島大地震，而《普京之吻》，話題新鮮熱辣，仲表現出年輕人對政治的盲目。」
Eddie又留意到，家新一代對內地新移民，有很多負面評價：「我哋每年都有經典重溫，今年有一套《甜蜜蜜》，我覺得導演對新移民在港拼搏的描畫很正面，年輕一代值得睇睇，其實香港以前好多人都是新移民，唔明家點解變成咁？」
動畫都有兒童不宜
帶小朋友睇電影，咪以為揀動畫一定無衰：「《兔子的日落大道》，內容有卡夫卡的人生荒謬感，而且幾血腥，小朋友唔係幾啱睇；波蘭地下動畫改編的《賤箭豬佐治》有鹹濕情節、有啲粗鄙，以有趣手法講時弊，更被列為三級，大人睇會覺得好好笑。」
Eddie認為今年好多真人電影，反而更充滿童真：「例如《空鞘武士》，故事講述一個落難武士帶着女兒，遇上要殺他的主公；唔想死只有一個條件，要喺30日內令喪母的少主笑，結果武士為了女兒，不惜扮小丑；過程相當搞笑，有點黑色幽默，小朋友看起來明白人情世故之外，又因惹笑唔覺悶！」
如今小朋友如此早熟，電視、電影是否元凶？「入屋嘅電視節目太入腦了！例如電視的動畫、劇集，戀愛情節、家變等情節不乏，小朋友天天接觸，好易投入其中。就算係今天電影中嘅白雪公主，都無舊版白雪公主咁童真啦，講到尾，可能大人都唔相信小朋友係天真無邪。」
香港國際電影節資料
電話：29703300
票價：各場地票價不一，約$40-$100。（全日制學生享六折優惠，票量有限。）
網頁： http://www.hkiff.org.hk
商品化無可避免
入屋卡通每每充斥情愛，是否造成小朋友對愛情過份早熟原因？始動輔導及發展中心心理輔導員冼文康指出：「這是雞同蛋問題，唔應該完全歸咎卡通內容！生活環境中嘅道德，同價值觀嘅改變，也是驅使卡通製作人配合市場需求的原因。的確有人評價現今卡通是『糖衣毒藥』，但一部好的卡通，確實可成為家長與小朋友溝通橋樑，例如借內容作適度的指引，一同探討內容及角色間的關係，從而了解孩子的感受，看法及灌輸家庭的核心價值觀。」
不過，有時卡通片會有延續性的發展，例如《數碼暴龍》、《寵物小精靈》，當中的數碼機械人，精靈等個個性格獨特，外形又可愛，生產商自然認為商機無限，家長們為了滿足孩子而一件不漏地「追買」，有機會令小朋友產生對物慾無止境的追求、又或購買「冒牌貨」等，這樣會破壞他們的價值觀！
小朋友最愛卡通普查！
新城DJ 好片Share
Bob（兩女兒：五個月、三歲半）
女兒愛看迪士尼公主系列動畫，故事雖全跟愛情有關，幸好內容都是導人向善、愛情純潔，相比我自小看打打殺殺的卡通，已經純得多；女兒大一點會陪她們看《反斗奇兵》，因當中談及的友情及感恩，都好真摯。
兒歌天后李紫昕
好多香港小粉絲，都說愛睇宮崎駿《崖上的波兒》，我則推介香港即將上映的《喜羊羊與灰太郎電影四之開心闖龍年》，內容講惡有惡報，又有勵志情節，對小朋友建立良好價值觀有幫助。
WilsonTang（兒子：五歲）
我推介《海底奇兵》，魚爸爸對兒子過份呵護，但最後終學懂放手，讓兒子去經歷生命，反照今天的家長很有意思。近年的《功夫熊貓2》主角熊貓在追尋自己身世中，明白人生際遇有時身不由己，最終能誠實面對自己，開拓更闊的人生。
林柏希（妹妹：十歲）
妹妹最愛看的電視卡通是《我們這一家》，當中的花師奶竟是她的偶像！個人認為商品化從來都有，家我都有搶購復刻玩具，有時商品化都無乜問題，可重拾童年回憶，我認為小朋友看《小雙俠》也不錯，可增進跨代溝通！
鹹蛋（兒子：六個月）
暫時B仔還小，但他最有反應的是看《Beavis&Butthead》中的Beavis，兒子看到其趣怪造型會很快樂！我同意從前的卡通較有故事性，現今的卻較注重造型，易令小朋友扭買玩具。個人推薦小朋友可看《藍精靈》及《哈利波特》系列。
