劉德華同葉德嫻主演嘅《桃姐》，喺香港同內地嘅票房成績都好理想，香港嘅票房更已經過咗1,300萬。據資料顯示，截至噚晚，《桃姐》喺內地上映首個星期嘅票房已經突破5,000萬人民幣，台灣嘅票房亦過咗3,000萬新台幣，即係三地嘅票房折合加埋約有超過8,000萬港元，真係可喜可賀。
繼續避談家事
噚日華仔、葉德嫻同秦海璐等喺北京出席慶功宴，《桃姐》成為下月舉行嘅香港電影金像獎熱門得獎電影，現場有記者問華仔，有冇諗過喺金像獎頒獎禮得獎，加上今年又生龍女，實行雙喜臨門？華仔聽完即面有難色話：「今天不說這個。」
唔少人都希望華仔同葉德嫻能夠再有機會合作，佢哋聽到都好開心同意。對於《桃姐》叫好叫座，電影公司老闆于冬都好開心，佢話：「我認為《桃姐》代表了一種精神，每個公司的老闆與員工的關係就應該像Roger對桃姐，劉德華對葉德嫻那樣。」
另外，噚日上映、由張家輝同任達華主演嘅《大追捕》，截至傍晚六點票房有59萬，成績相當唔錯，今次港產片市場真係復蘇有望。