一位英文女教師在尖沙嘴連卡佛買了個約值一萬八千元的CHANEL手袋，一用手挽即斷，連卡佛答應換新手袋之餘，見她幫襯多年，又是VIP，於是再送她一萬元購物禮券，怎料該女子不肯接受，並向《蘋果》投訴，要求連卡佛賠償三萬元和一個價值四萬元的CHANEL手袋。
沙膽虹心諗，小姐，你家當《蘋果》係黑社會呀？你搵《蘋果》出頭，你估《蘋果》就會不分青紅皂白站在你那邊，嚇到連卡佛怕見報息事寧人有求必應你要幾多就賠幾多咩？如果你話連卡佛賣假嘢，你咪報警囉！家你要屈人賠錢，又擺《蘋果》上枱，《蘋果》絕對不會站在你那邊！
上次食家幟哥搭國泰機飛倫敦，飛機誤點十個鐘，幟哥誤以為國泰超收客人，向《蘋果》投訴，《蘋果》記者到場採訪，國泰前線員工可能經驗唔夠被嚇親，馬上位位賠四萬，幟哥一行六人就二十四萬。沙膽虹對此事都耿耿於懷一陣子，反省《蘋果》會不會因幫人而被利用變幫兇？
對於那些無良商人，把斤當両、両當錢去呃消費者的騙子，《蘋果》絕不手軟，必會為消費者出頭，踢爆這些奸商，還會與海關合作將這些黑店繩之於法。但如果是消費者無理，擺《蘋果》上枱，利用《蘋果》招牌去恐嚇人賠錢，《蘋果》絕不會不分忠奸被人愚弄。
沙膽虹