雖然晉佳長線肯定睇淡，但周三溫總講完嘢，大家鬥快掟貨，而噚日熊證街貨都唔跌，似乎大戶都未睇淡。加上即月期指噚日表現唔太差，A股偏弱，港股都唔太跌得落，似乎仲未斷氣，短線有機會再試頂，甚至突破22000，趁你解除戒備嘅時候先會收皮。
近排好難搵股炒，唔可以搵個靚圖就落場，最好搵啲走勢好、基本因素又好轉嘅冷門股，貪佢股價升啲人都唔敢跟，北京首都機場（694）值得留意。
首機2008年向母公司買入3號航站樓資產，即時令折舊同財務費用增加，盈利下跌。到2010年10月，首機又向母公司配股，集資58億元，大大降低財務成本，跟住盈利就正式「起飛」，由2011年開始進入盈利上升里程，相信慢慢會被市場Re-rate為增長股。
舊年上半年，首機純利升1.5倍到5.14億元人民幣，點解升得咁厲害？因整體成本中，佔一半係折舊同財務成本，其餘唔少同樣係固定成本；跟住收入變動嘅可變成本好有限，期內員工成本就只佔經營及財務成本7.5%。由於收入上升，成本基本不變，所以舊年收入只升13.3%，盈利就爆升1.5倍，槓桿超過10倍！
盈利料爆升睇5蚊
舊年下半年，首機飛機起降架次同旅客吞吐量，分別較上半年增長4.2%及7.8%，加上成本變數低，相信下半年業績會相當唔錯。至於今年1月受經濟放緩影響，依然按年上升2.5%及4.9%，雖然盈利增長會放緩，但業績都有可能平穩增長。保守啲將首機舊年下半年業績乘二，市盈率約14.8倍，其實只會更低過呢個水平，對於盈利回復增長勢頭嘅股份嚟講，估值仲可以有排升，你唔信？股價似乎係咁樣走喎。
比起其他航空股，首機優勝之處在於成本，航空股盤數點都要睇吓Chok上Chok落嘅燃油成本，如果客運率唔夠高，成本又高咗，勢必影響盈利，首機嘅盈利、成本變數就低得多。時勢唔明朗，其他搶眼嘅股份又炒得七七八八，大家信心麻麻，反而冷門股可以秤先，現價買入，中短線突破4.70元阻力問題不大，目標價先睇5元。
晉佳
本欄逢周一、三及五刊出