曼聯領隊費格遜證實，喺08年夏天以破球會紀錄3,075萬鎊加盟嘅前鋒貝碧托夫（圖），將會喺今個夏天離隊。費爵爺話，31歲嘅貝碧好想打正選，但佢唔能夠作出保證，於是惟有畀佢走。但貝碧季尾約滿，即係話曼聯一個仙收唔番，荷包真係幾傷。另外，大腿受傷嘅路爾斯安達臣，證明唔使收「咧」，只係唞4至5個月，費Sir可以鬆一口氣啦！