港股埋單微升45點，但企業抽水活動漸頻密，如果再冇利好消息刺激，10日及20日線支持未必頂得好耐，隨時要下試250日線20800水平。
雖然大市高位遇阻，但個股仍有唔錯嘅表現，盈喜股大成生化（809）噚日爆升8%，同樣有盈喜護身嘅翔宇疏浚（871），值得關注。呢家主打疏浚業務嘅公司，本月初發盈喜，受惠合同金額增加，預期去年業績將大幅提升，消息刺激股價短短5日爆升三成，之後由高位回落，噚日即市低見2.45元、即高位回調0.5倍水平後急彈，明顯有買盤跟進，後市有力再抽多浸。截至去年6月底，翔宇半年賺1.35億人仔，按年增長1.1倍，由於內地疏浚效率仍低，公司發展空間極大，近期更加用咗1.4億銀收購絞吸式挖泥船，提升服務質素。翔宇昨收2.59元，跌1.2%，下星期五（23日）公佈業績，近日回落成交縮，證明沽壓唔大，現價買入，博呢幾日炒返上去2.80元，跌穿2.45元即閃。
唐牛