曼聯嘅巴西中場路爾斯安達臣（圖）相當運滯，啱啱傷完冇耐又要長唞，今次仲好可能要收「咧」㖭！安達臣今季傷多過踢，喺上星期歐霸16強首回合對畢爾包嘅比賽先啱啱復出，點知之後喺操練又觸傷鼠蹊，好大機會踢唔到今季餘下嘅賽事。不過曼聯都麻木晒咯，因為球隊今季都慣咗冇安達臣；同埋家有史高斯重出江湖，就算安達臣冇傷，都輪唔到佢踢正選啦。