日前有雜誌稱本港金融業萎縮並爆發裁員潮，昨日無意間聽到兩位疑似證券行老闆的對話，頗能反映實況。
茶客A：「唉，個市係咁升但生意額一路都咁差，靠啲散客根本維唔到皮。」茶客B：「係啦，班大客唔落場都冇肉食，啲粒神嘢（應指細價股）唔使睇住㗎嘞，大路股又難炒，唔知要捱到幾時。」全程對話冇厘神氣兼唉聲嘆氣，可見小型證券行營運困難，C組經紀市佔率幾難止跌回升。
大市升勢似尾聲
講開細價股，昨日丹楓控股（271）狂升24%後，下午時段突然停牌，午後發通告稱涉及股價敏感消息。此股慣常被稱為「小甜甜概念股」（由已故龔如心持有股份），同系的安寧控股（128）勁升近兩成，宏霸數碼（802）都升逾一成，不過呢個概念炒了多年，一直都得個炒字，炒概念要眼明手快，不是一般散戶應付得來。
的確，近日港股的升市無甚主題可言，核電股炒得一日就玩完，兩會概念股幾乎毫無聲氣，環保水利股嗎？亦唔見有多大資金追捧，昨日較似樣的是幾隻濠賭股，因有大行出報告調高行業評級及目標價，如純睇圖，銀河娛樂（027）是比較似樣的一隻，美高梅中國（2282）亦似剛剛爆發，這些大路濠賭股或仍有再升動力。
內房股方面，龍湖（960）公佈業績後大行對其負債大減讚不絕口，可能都未升完。不過，當短炒越來越困難，找股票炒又難以找到亮點，大市可能真的升到差不多了。
歐陽風