基昂訪港，唱好兵工廠！三度帶領阿仙奴勇奪英超錦標嘅一代名將基昂，噚日旋風式襲港，代表母會交代今年7月29日喺香港大球場對「港版巴塞」傑志嘅表演賽詳情，仲保證會強陣訪港。45歲嘅佢身形冇走樣之餘，仲識賣口乖，話睇好阿仙奴超越同市宿敵熱刺，坐四望三！
基昂、迪臣、溫特本及阿當斯「四大長老」，多年嚟教兵工廠迷津津樂道；當中喺04年有份協助球隊歷史性不敗封王嘅「基大」，噚日就以母會足球大使身份訪港出席記者會，聲稱仲有keep「弗」嘅佢，身形唔比同場傑志嘅前富咸中堅列文同前鋒盧比度差㖭。
大讚華美倫似佢咁勁
雖然基昂噚日晨早7點就抵港，下晝出席完記者會，傍晚再同阿仙奴亞洲官方球迷會會面，今朝晨咁早就要走；但風塵僕僕嘅佢噚日喺記招都有問必答，態度友善。講到近排越戰越勇、暫列英超第4嘅兵工廠，基昂就把握機會「護主」︰「領隊雲格帶領球隊揭開了新一頁，對比球隊不敗封王嗰年，家班後防主力如華美倫、哥斯尼等，默契同技術上都同我哋當年差唔多，我認為佢哋係現時英超最佳嘅一對中堅。」基昂大讚華美倫有佢影子，不過今季阿仙奴試過俾紅魔炒8:2，家失39球又係前4之中最差，讚到佢哋咁勁，基昂真係「無私心」喇！
望曼城壓紅魔贏英超
至於今年睇好邊隊捧聯賽冠軍，一度被英傳媒指係曼聯球迷嘅基昂就否認傳聞，仲笑住話希望曼城封王；佢身旁嘅職員補充︰「唔通你唔記得佢同雲尼斯達萊（前曼聯球星）嘅恩怨咩？」
關於阿仙奴訪港，與基昂同行嘅球會商務總監霍湯姆就重申：「今次亞洲之旅係為球隊作季前準備，絕非度假，並保證會安排活動與球迷接觸。」保證強陣訪港，仲有至少有5名標誌性球員隨隊嘅兵工廠，將喺7月27日同另一支英超隊曼城喺北京鳥巢交鋒，當晚賽後即刻起程來港。門票方面，東道主傑志總領隊伍健就話稍後先公佈。
