一批耶魯大學學生回訪中大新亞書院，星期一下午到中環參觀，約在「鏞記」吃午飯，但因人生路不熟，唔識訂位，話臨時搵一人在鏞記地下攞位喎，中午時份，鏞記地下人頭湧湧，邊度有得攞位㗎，俾夥記趕走都似，其他食客亦唔會肯過佢地。左丁山事先聞訊，自動請纓，同佢地訂位，請埋佢地食。
十八年前開始，新亞書院每年選派十零位學生在農曆年到耶魯交流，到咗美國大學春假（SpringBreak），同樣數目耶魯生就回訪新亞，訪問並唔係一味旅遊參觀，而係要參加一個主題討論，深入社區了解當地民生，譬如今年嘅主題好似係資本主義與社會，佢地從「佔領華爾街運動」嘅出發點，喺香港搵莊太量（經濟學教授）、黃洪（社會學教授），StanWong（政治學教授）等等幾位中大老師講解香港情況。呢日早上聽完書，就到中環吃午飯，之後實地考察「佔領中環」。點解要到鏞記呢？別無他意，只因鏞記名聲響亮，旅遊書有講，而且位於中環而已。
食完燒鵝、叉燒、清湯腩、粥粉麪等等之後，佢地話好多謝左丁山慷慨。左丁山對佢地講：「不必多謝，耶魯學士透過雅禮會安排，自六十年代初開始來新亞教英文，惠益不少本地學生，其中一位黎天睦先生，就係本人英文老師，我一世人都要多謝佢，你地返到去，搵黎先生多謝就得啦。若非係佢，我地無緣隔代相逢。」一講之下，原來到中環之九位耶魯學生之中，有四位係「黎天睦學人」（TimothyLightFellow），得黎先生獎學金，在主修科以外，在耶魯進修中文。黎先生本人在新亞學習中文，在美國退休後，念念不忘中國文化，捐錢俾母校促進中文學習，其心意可感，佢一生為教育貢獻，以語言及宗教研究為本業，作育英才無數，可以講得係教育家典範。
要領略「佔領中環」，先要知道中環表面，左丁山帶住班學生由威靈頓街行落嚟，上娛樂行，往中建大廈到置地廣場、太子行、渣打銀行，出去炮台徑，見吓終審法院、聖約翰大教堂，再經長江公園行落去滙豐銀行地下，短短二十幾分鐘行程，將中環之過去及現在簡單介紹一遍，見盡繁華表面，佢地又會與重慶大廈專家，人類學教授GordonMathews學習城市深層嘅啫。