蘋機會：人手打磨拋光　精鋼耳筒贏低頻

日本311災難剛好一年，房屋破壞了，但日本嘅精湛工藝並無絲毫動搖！將於4月推出嘅MURAMASAVIII耳筒，叫價達五萬元，矜貴處在於人手打磨同裝嵌嘅精鋼音箱，加埋二路單元設計，動態與低頻都提升咗，耳筒一樣有發燒級嘅音色。

記者：陳國輝　
攝影：黃子偉

恍如金屬藝術品

坦白講，現場試用MURAMASAVIII，真係好似戴咗兩嚿鐵上頭咁，重到無可能拎出街。但其實佢並非為Outdoor音樂發燒友而設，你只需安坐家中，放鬆身體並躺卧於沙發上，便會自然地投入到MURAMASAVIII音樂世界，根本毋須刻意換上輕巧物料嚟方便大家拎出街。
新耳筒最大特點，係機箱物料採用高抗蝕性嘅精鋼，好處除咗具備自然聲音特質，更因增強聲音反射以及減低微量諧震，從而令音色更立體、更原汁原味。此外，再加上經多重人工修飾嘅精鋼部件，包括磨滑、切削及拋光等，精湛程度恍如日本武士刀工藝，擺在家中，已經係一件漂亮藝術品。
大費周章用上精鋼，並非只為外觀，MURAMASAVIII獨特音色亦同呢種物料相互配合。精鋼製固定單元嘅套環，能令音色節奏更輕快、低頻更厚實；而呈半球體嘅精鋼製底板，更將FinalAudio專利嘅平衡空氣流動結構（BAM）概念，融入耳筒，進一步提升低頻和動態表現，令音色更立體。