拐子佬驚現香港！全城家長聞「拐」色變，更加引起圈中父母恐慌。轉移到內地發展的陳慧珊，第一時間留港保護女兒，前日她與破產老公Mike結伴接囡囡放學，拖實女兒Mira不放。前港姐朱凱婷昨日逛商場時，更緊張地攬實3個月大的B女。
拐子佬傳言鬧得滿城風雨，最近網上盛傳香港出現拐子佬後，日前再爆出九龍塘喇沙小學出現疑似拐子佬，亦有聽眾致電電台報稱在一個主題樂園美食廣場，有疑似拐子佬欲抱走他的兒子，全港小學、幼稚園、商場及公園即時陷入緊急狀態，全城家長杯弓蛇影聞風喪膽，竭盡所能保護子女安全，一眾星爸媽更加聞「拐」色變。
與老公湊女放學
現年41歲的陳慧珊久別香港幕前，主力在內地發展，自從近日香港傳出有拐子佬後，正在北京拍劇的陳慧珊與全城家長一樣進入高度戒備狀態，留港保護正在入讀幼稚園的5歲大女兒鍾律然（Mira）。前日陳慧珊罕有地與經理人兼老公鍾家鴻（Mike）一齊湊女放學，並且比平時小心防範，兩公婆一直拖實女兒。
前日下午3時，陳慧珊揸車與老公抵達女兒就讀位於半山區的幼稚園，她全程表現小心，一直戴上口罩，以防被認出女兒的媽咪是明星，女兒未夠鐘放學，兩公婆一直留在車廂等候，顯得相當低調。直至放學時間，二人才落車十指緊扣進入幼稚園，記者上前問陳慧珊是否擔心拐子佬？她木無表情沒有回答，Mike則說：「唔該晒。」避談拐子佬敏感話題。
幼稚園加強保安
Mira入讀的幼稚園亦比平時保安更嚴密，大門深鎖，陳慧珊按門鐘後，校工確認家長身份後，才能進入幼稚園，幾分鐘後，陳慧珊戴着口罩步出校門，試圖調走記者說：「今日唔講嘢，你哋走喇。」半小時後，陳慧珊與老公左右兩邊拖實女兒離開，戴上花帽仔的Mira相當活潑可愛，在父母拖實下蹦蹦跳地安全返家。
另外，01年港姐季軍朱凱婷昨日下午2時許，與老公Dickens抱着三個月大的B女林穎彤（Sheryl）逛又一城商場。小B女一身粉紅裝扮，臉珠仔十足小蘋果一樣，又肥又可愛。朱凱婷夫婦行了多間嬰兒服裝店為BB置新裝，Dickens負責推BB車，朱凱婷則全程攬實BB沒有放過手，見她一手揀BB衫，一手抱BB，顯得有點吃力。
之後朱凱婷和老公到附近的日本餐廳hightea，她原本抱着BB與老公對着坐，但因為不捨得將BB放在BB車內，最終寧願坐在同一邊，並輪流抱BB，見二人邊吃邊逗BB玩，場面溫馨。
朱凱婷：都好擔心
朱凱婷昨日在電話中表示十分關注近日的拐子佬事件，她說：「都聽過話有人連人帶BB車一齊推走，雖然唔知係咪真，但都好擔心，所以我行街一定要孖咇，如果老公飛咗，就會帶埋工人或者奶奶，唔係擰轉身揀衫都會好唔放心。」她透露B女現有15磅重，而且好乖好易湊，她笑說：「BB兩個月大已戒咗夜奶，佢仲遺傳咗爹哋，食嘢幾乖，又同我一樣咁瞓得，但我未有打算追龍B。」
採訪、攝影：黃曉妍、黃曉程、李志明、仇志德
