上海仔被指是「不速之嚇」，跟恐怖片齊名，凡上海佬上海婆上海幫都應該挺身而出，抗議抹黑。近日就有上海人揚言，要在報章賣全版廣告，宣示「一條上海仔，唔代表我！」
上海仔一夜爆紅，上海街多得佢唔少，業主加租，食住個勢，甚至唔介意，上海街主權移交，叫做上海租界，姓劉那位仁兄晚晚安排飯局，八折埋單又點話。
記者口痕問，上海仔個親戚，是不是上海姑爺？佢個贊助商，是不是上海灘？上海仔英文點講？網友投票，Shanghaichai（一定要用唐唐三六零腔念出來）暫時贏ShanghaiMan。
梁營那餐飯，被發現極難消化，食家很想搞清楚，當日吃過什麼咁難鯁？是a操操聲的上海粗炒？b驚死你唔河蟹的蟹粉小籠包？c保證揭你的三鮮鍋巴？
住深圳樓，食澳門菜遠遠比識上海仔，共圍村飯安全、妥當。這一回，大把人陪佢當黑，曾特首終於可以鬆開扭曲的口臉，破涕為笑。而由坐館不幸淪為坐枱，黑社會大佬瘀爆江湖，三月初四，隨時踢竇大報復！小心！