楊思琦宣佈生女，李泳豪曖昧暗示有中韓混血新歡Miki贈興，佢仲強調同舊愛冇翻撻機會，不過Miki容貌曝光馬上被爆有多重身份，有指在微博化名玫瑰Kitty，但最嚇人一跳係佢原來已為人妻，老公Jerry指老婆真名係Jinling，佢喺facebook鬧爆豪仔向其妻抽水做新聞，Jerry日前話：「唔該阿李生唔好無中生有，唔好再抽水，你所講女友嘅相係盜用我老婆嘅相。你害到人哋啲朋友好擔心，你騷擾到人哋嘅生活，你做新聞還做新聞，總之唔好影響到人。」
發相證人妻身份
Jerry仲提供咗一張Miki曾見報穿圍裙整蛋糕嘅相，佢強調相中人係佢老婆09年影嘅，仲話當時個蛋糕整畀佢嘅。Jerry前晚寸爆豪仔：「條友唔會09年叫自己做Jerry呀。」擁有多重身份嘅Miki現年25歲，有指佢家住沙田屋苑，早年做過兼職模特兒，家喺中環律師行做文員，噚日仲有報道話佢同即將結婚嘅洪天明拍過半年拖，Miki索性把玫瑰Kitty嘅微博鏟走。
豪仔噚日熄電話潛水避傳媒，一向撐佢嘅大孖李泳漢早前爆料指喺屋企雪櫃見過泡菜，但噚日問到佢Miki嫁咗人，泳漢喺電話衝口而出話：「咁大鑊，我未見過Miki，我要了解吓先，泳豪係我關心嘅細佬，我想佢開心。」