兩個星期以來，梁振英陣營不斷放風，指梁生贏硬，目的有兩個，一是向挺唐選委招安，向唐營滲沙子，打擊唐營士氣，二是向並未提名任何人嘅311名選委招手，叫佢地西瓜靠大邊，不要押錯注。有數得計，梁振英已有305個提名，在311名未公開表態嘅選委中攞齊至少296票（即95%）先至夠601票，其實有難度，只要挺唐選委不變心，挺何泛民選委不變心，唐生在商界攞多二十票嘅話，梁振英就冇法子達至601嘅目標，故此必須出全力向唐營挖票。挖票工具之一就係唱行「私生子」與「梁生贏硬」，希望選委產生識時務者為俊傑嘅心理。
點知天有不測之風雲，梁營死士劉夢熊過份熱心，要到鄉下挖票，出動疑似江湖大佬到飯局，俾親唐傳媒踢爆，之後反咬，挺梁報紙訪問大佬，傳話掌握更多唐生黑料，嚇到唐公子去報警，咁就有排煩咯，何況前廉署專員兼前教育署常秘竟然不避嫌，與大佬同枱食飯，成何規矩？羅范拉票（據蘋果日報三月十一日）都唔駛咁不顧身份呀？佢記唔記得自己曾經做過乜嘢重要官職呀？劉夢熊在北京對住電視鏡頭講過，有北京軍方人士介紹「上海仔」俾佢識，間接連解放軍都拖埋落水，諗落得人驚，梁營背後有軍方，有江湖人士，有中聯辦齊發功，唔怪得典型香港仔，一路俾人㩒住砌，香港正當人家邊度識咁多蠱惑嘢嘅啫。梁振英不出席「普選聯」論壇，在電視台拍心口話自己最民主；不出席法律界選委論壇，講法治嘅政綱只有十二個字；梁生睇低法律選委論壇，唐營就收到中聯辦電話，叫唐生都唔好出席法律界選委論壇（據信報報導），教人知道，北京港澳辦（聽王光亞發言）不肯放棄挺唐，香港中聯辦就有人全力挺梁踩唐。
選情如此陰險，黑金政治暫佔上風，不能不令人擔心。長江基建主席李澤鉅上星期宣佈業績時，被記者問及香港經濟情況及前景，佢如此答：法治、自由及資金出入是香港的基石，要注意到一個地方嘅政治取向，取向由市民決定，有咗取向，經濟現實會與之互動。答得幾玄，左丁山聽慣商界語言，當然知道，特首雖則不是普選產生，但唐上場或是梁登位，就會催生不同之政治/經濟互動場景。