在無綫主持多個節目、身兼電台DJ的林盛斌（Bob），早前被指去揼邪骨及買四仔鹹碟，令好老公形象受到質疑，幸獲太太Pearl力撐，可能近排曝光率太高易招惹是非，Bob又被本報讀者爆料與妙齡女郎同遊澳門歸來斷正，有相為證，不過Bob聞言輕鬆解畫，以示清白。
最近Bob在無綫密密做賺到不少，夠買樓安頓妻女，好男人形象爆燈，不過早前就被指曾去揼邪骨兼買四仔鹹碟，Bob當日已澄清向來有揼骨嗜好，只是不知幫襯的地方「有料」，但他大方承認買四仔，且得到太太Pearl力撐，順利度過危機。
搭夜船返港
不過昨日本報收到讀者報料，指Bob與一妙齡女郎在上周六（10日）同遊澳門後一同乘船回港，並提供多張照片，從照片所見，Bob與長髮妙齡女子同行，不時傾偈，及後還一同乘的士離開上環港澳碼頭。
Bob昨在電話中回覆時，輕鬆地說：「嘩！好多謝個讀者喎！其實嗰日我去澳門做job，一間工程公司嘅活動司儀，同行仲有個中介人帶埋兩個model做禮儀小姐，做完後中介人同另一個model留喺澳門，我就同呢個女仔一齊搭11點半船返香港，之後仲一齊搭的士，因為佢住將軍澳，我住旺角，咪車埋佢過去轉車囉，我都係嗰日先識呢個女仔咋。」
其實Bob可能因上次揼骨事件而惹人猜疑，問Bob會否不開心？他說：「冇嘅，要咁諗都冇辦法，多謝佢關心。」
採訪：丁寧
