前港姐楊思琦近日在美國未婚產女，去年被她狠撇的舊愛李泳豪馬上暗示感情有着落，新歡被爆是中韓混血女模Miki，失戀有新歡撫平傷口本來可喜可賀，但新歡Miki卻被爆化名多多，身份複雜，最驚爆是她已為人妻，若然屬實，表錯情的豪仔又要傷心多一次。
楊思琦去年和李家鼎兒子李泳豪爆分手，女方劈腿戀上空心佬倌吳帥，未婚懷孕，近日在美國秘密產龍女Krystal，B女爸爸冇影。思琦勇敢做未婚媽咪，有指她本月底返港為復出做準備。
豪仔眼見舊愛已為人母後，不甘示弱曖昧爆有新歡，女方是中韓混血女模Miki，豪仔更直認有好感，暗示舊不如新，還斬纜表示無意翻撻思琦。可是Miki剛曝光，卻被爆有老公，豪仔為向思琦示威，原來卻表錯情。
Miki老公斥有人抽水
豪仔新歡Miki樣貌曝光兼被大起底後，有自稱是女方丈夫的JerryTsang在facebook爆料指豪仔借其妻抽水，還認出部份照片是跟太太去愛琴海時拍下的，Jerry又護妻指不想被騷擾。根據facebook資料顯示，Jerry的太太名字是JinlingHuang，相簿中還有夫婦親暱結婚照。
Miki自被爆戀上豪仔後，即潛水避傳媒，不但刪走微博留言，連戶名都改為玫瑰Kitty。到底Miki、玫瑰Kitty和Jinling是人有相似，抑或Jinling化名背夫偷食，耐人尋味。記者聯絡Jerry問到可知太太是否認識豪仔？他答：「唔識，以前電視有睇過吓，家睇報紙先知佢叫乜名。」
Miki被爆認識BOYZ成員張致恒（Steven），記者把Miki和Jinling的相傳給他求證可是同一人，Steven昨日在電話中說：「係同一個人，朋友介紹我識，我識咗Miki都三年，大家有聯絡，但唔知佢係單身定有另一半，佢其實唔係model，佢只係一個文員。」
豪仔堅拒翻撻舊愛
豪仔昨日現身電視城，被問到有三個新歡，他說：「誤會嚟，係識咗好耐嘅同事。」談到可有被Miki詐型，他說：「家呢的問題真係唔想回應，唔想影響人，我想集中工作。」可有與思琦聯絡，他則說：「冇呀，我都係睇雜誌先知佢幾時返。」
問到會否再考慮跟思琦修補關係？豪仔堅決說：「我唔係仲等緊，只係唔想再回應呢啲問題，成件事告一段落，同埋佢啱啱生完，唔想有太多聲音影響佢嘅情緒。如果我再拍拖真係會同大家講，家實在太複雜。」
李家鼎表示未見過Miki，可擔心豪仔癡心錯付，鼎爺昨日在電話中說：「佢咁大個仔，有自己主見，要㩒都㩒唔住，要尊重佢，如果啱嘅點都支持佢。」
採訪、攝影：楊浩賢、何慧斯、比華利
解碼：爆大情聖
楊思琦日前在微博公告當了未婚媽媽，產下可愛囡囡，舊愛李泳豪當然感覺酸溜溜，他不甘寂寞，傳出落選港姐黃瑩、前年港姐亞軍張秀文和中韓混血女Miki都爭相向他獻媚，令豪仔馬上變情聖兼筍盤。
張秀文日前否認主動追求，她表示自己感情上是被動的女生。其實不排除有人妒忌舊愛升呢做媽咪，可是B女父親並非自己，內心不舒服，所以刻意放風自己回復單身及有異性緣，可惜緋聞女友不但聲稱唔過電，還有被爆已婚，男方這次比遭女撇更爆。
