蘋機會：三藩市實試　最強防震Cap高比

身為一個NBA超級Fan士，有機會嚟到美國，好難抵得住去現場睇波嘅誘惑，花成三千蚊買張波飛，梗係雄心萬丈，想影到拍住體育記者嘅激戰靚相。全靠OM-D的5軸防震，即使喪Zoom600mm，一樣毋懼手震，高比動作有幾快，一樣將佢臉上「鬼面罩」影得清清楚楚！

記者、攝影：韓繼聰

600mm無腳架　遠攝兩大球王

■要捕捉運動員極速動作，一部防手震相機搭長鏡大炮，缺一不可。

雖然今次NBA之旅早有準備，早早上網訂定飛，但由於湖人對熱火戲碼太強，即使豪花三千大元，都只能坐到中間位置，不過話晒高比同占士兩大球王碰頭，呢啲錢係無得慳嘅。
早知位置唔近，當然帶定好「架生」，最新OM-D加支140-600mm大炮，誓要影到高比英姿！入到場開盡600mm火力，座位偏遠都仍將球王盡攝入鏡，尤其高比、占士急攻速防時，更覺OM-D嘅5軸防震名不虛傳，即使用到600mm兼無腳架輔助之下，相片依然實淨清晰，就連高比嘅透明「鬼面罩」都睇得清清楚楚，爽！
對焦方面，用長鏡當然唔及用Kit鏡快，但佢嘅FAST對焦系統依然令我滿意。雖然偶有鏡頭狂轉搵焦情況，但大部份時間都相當爽快，加上9fps連拍夠快夠強，要遠攝高比同占士兩大球王英姿，可謂無難度。

■Hot爆LakersGirls，試到新機對焦快夾準。

■高比不論帶波、射波都引嚟歡呼聲。

■早前被襲受傷，高比要戴上透明Mask護住塊臉。

■就係佢，韋迪！明星賽惡意犯規，俾人噓到爆。

■勒邦占士都叫出盡全力，不過都係輸波收場。

復古Look吸眼球

波，總有完場一刻，雖然不捨，但還是要出街逛逛。經過六日相處，無論日景夜景，OM-D影像精細銳利之餘，色彩亦鮮艷亮麗，加上有效解決偽色同增強解像度的RealColorTechnology，相片效果極為理想。電子觀景器非常方便我喺陽光普照嘅加州取景，操作手感亦相當好；機頂右方雙轉盤，在M-Mode時調校光圈快門好方便，加上手握位好揸手，影足全日都唔覺攰。Kit鏡對焦極快，更愛佢可作電子或手動變焦調校；拍片時用電子對焦夠順暢，影相時用手動則夠爽快，一舉兩得。
加州景靚鬼妹正，點少得幫自己留下倩影。隨街搵途人幫忙拍照，每次對方總會忍唔住讚句「Cool！」或「NiceCamera！」。無他嘅，OM-D仿古外形真係好殺食，鬼佬們一拎上手，總愛把玩一番。加埋防塵防水滴嘅全天候鎂合金外殼，OM-D絕對內外兼備，已經成為我心目中嘅首席外遊伙伴。