正所謂不是寃家不聚頭，內地視頻兩大巨頭優酷同土豆之前互相駁火，噚日就公佈合併，即將聯婚。佢哋二合為一之後，將會成為新公司「優酷土豆」，優酷嘅股東會有新公司71.5%股份，土豆股東就有28.5%。
華華話佢哋係寃家，皆因佢哋真係好似三色台劇集咁，曾經你告我我鬧你。
盜播曾掀訴訟
土豆網之前起訴過優酷，話優酷盜播劇集《康熙來了》同埋其他收費節目，但係優酷就話土豆網不公平競爭，簡單啲講即係壟斷……
點知今次忽然間又話佢哋要聯婚，以100%換股方式合併，每股土豆可以換到優酷7.177股，土豆嘅ADS（美國存託證券）就可以換1.595優酷ADS，換完土豆就會除牌，變成喺美國紐約上市嘅優酷土豆。雙方董事都話，會支持今次合併，不過仲要過股東一關。