星爺周星馳做大股東嘅比高集團（8220），噚日開股東特別大會，等股東投票係咪通過星爺以大折讓價增持公司股份，唔知星爺係咪好有信心，所以冇親身到場拉票（佢之前都有開記招同唐英年拉票，唔通係對唐唐冇信心？）搞到華華同好多諗住去股東會一睹星爺風采嘅股東一樣，都係撲個空，—切皆因星爺始終醉心電影。
「驚出鏡唔夠型」
唔經唔覺，星爺正式入主比高都差唔多兩年，起初華華以為星爺做咗上市公司老闆，會放少咗時間喺電影方面，點知星爺始終係流電影嘅血，據比高非執行董事鄒重珩（Roberta）同華華講，星爺近排忙住為佢新一套《西遊記》做後期製作，向來連搞笑都認真過人嘅周星馳，相當重視呢套電影嘅後期製作，近排實行「閉關」，星爺驚呢排自己唔在狀態，出鏡唔夠有型，所以缺席股東會喎。
計華華話，星爺無疑係有型，但佢嘅幽默更加一絕，就算佢以《武狀元蘇乞兒》嘅乞兒造型或者《西遊記》系列嘅孫悟空造型到場，都一樣咁型英帥靚正，實俾股東同記者包圍啦！
聽講唔少投資者（專業同散戶都有）都係因為星爺先買入比高，結果坐哂艇，希望星爺可以多啲露面，為比高打打氣啦。
李華華
mailto:[email protected]
