近10年，打工仔嘅人工大多數都跑輸通脹，報業如是。噚日有消息話，多份報紙有意喺本月底前加價到7蚊，或者報業唔似得中電、麥記咁可以密密加，賺到盡，所以缸湖睇得都幾正面，噚日開市，傳媒股全線逆市向上。
壹傳媒發盈警
之不過，路邊社消息話唔好咁樂觀住，一切仲有變數。唔知係咪咁，部份傳媒股午市後升幅收窄，經濟日報（423）同南華早報（583）收市無升跌，星島（1105）更倒跌收場。
壹傳媒（282）就好啲，最多升5.8%，收報0.7元，升1.5%。但壹傳媒噚日收市後發盈警，話因為電視同多媒體業務營運開支增加，加上台灣有線電視延遲啟播，估計全年虧損會擴大。近年免費報紙競爭激烈，收費報章亦要精益求精，正如老總沙膽虹上個月喺手記話，加價報館賺多啲，對股東、同事都好啲，報館亦都會挖多啲新聞畀讀者睇，係一個三贏局面嚟嘅！