無綫節目《都巿閒情》前主持羅貫峰過咗檔城巿電訊嘅免費電視台，但佢份新約要到今年六月先生效，咁貫峰就可以趁呢段時間，陪上周二為佢生咗可愛龍仔嘅老婆坐月，BB重六磅六安士，堪輿學家李丞責仲幫BB改咗名做羅俊洛，而貫峰上周五已接咗妻兒出院。
幫囝囝冲凉
新任爸爸貫峰心情興奮又雀躍，佢連日嚟不斷將囝囝嘅靚相貼上微博，小俊洛眼仔睩睩、輪廓分明、頭髮濃密，佢出世雖然得幾日，但面對鏡頭表情多多，遺傳咗做主持嘅爸爸嗰種優良傳統。
35歲嘅貫峰請咗陪月員喺日間照顧太太，但夜晚就由佢呢個廿四孝爸爸負責，貫峰噚日話：「我日日幫手換片、餵奶同冲凉，太太順產都有傷口，佢唔踎得低，呢啲嘢由我嚟幫手。」講到做爸爸嘅感受，貫峰話：「我終於見到有嚿嘢係我㗎啦，冇人攞得走，冇人會叫你畀番佢，我只希望囝囝聽話同健康。」問貫峰將來俊洛長大如果想入娛樂圈，佢會點睇？貫峰話：「我一定同佢分析得清清楚楚，做呢行唔係玩玩吓，一定要啱嗰個心態。」