私駕路：平三萬蚊玩棍　一噸巨躉

早兩日SuperJunior開騷唔只吸引粉絲四圍撲飛，貴飛更於兩分鐘搶完，墟冚程度直逼LadyGaGa，日本歌手都要企埋一邊。但搶手嘅又點只SuperJunior，從韓國到港的現代H-1唔只有實力，今次棍波版仲要唔使$19萬，新一代Van王非佢莫屬。

記者：李鑒泉
攝影：蔡家輝、楊錦文
Model:BooKwok
鳴謝：BikeStop（23582661）

七人車頭造型煞食

■駕駛有大大個尾艙的H-1，一家人就可輕輕鬆鬆去郊外騎單車！

韓流熱潮的興起，有賴南韓政府早於九十年代已資助文化發展，從《大長今》到《善德女王》，從東方神起到現在WonderGirls、SuperJunior等，連大衞牙擦騷都要找少女時代訪問就知厲害。除軟實力外，韓國企業更涉獵家電、手機、甚至造船、軍工等不同範疇。汽車業亦不遑多讓，現代從廉價代替品一躍成為歐日車廠不得不正視的競爭對手，從入門i10到頂級Equus，就連商用車市場也有H-1作打手，成功動搖日本車多年來累積的根基。
即使日本客貨車仍然佔多數，但現代H-1卻以煞食外形一洗搵食車形象。以MPV為藍本的H-1，儘管今次長測版本刪去側鏡LED指揮燈、改用啞色鬼面罩及鋼軨，但其餘部份與豪華版別無二樣，車頭前傾線條驟眼看酷似七人車，唔少車主更另加包圍，讓外形更吸引。不過，5,125×1,920×1,935mm體積就連七人車也望塵莫及，可惜法例必須改為密封尾艙，否則八人版、甚至十人車版本的H-1足以再衝擊日本車的領導地位。

■棍波版H-1十九萬元有找，省回的錢夠買近兩萬元的iF單車。

■車頭感覺四正，就算女生都唔抗拒。車尾造型相對平實。

五速波箱低轉推背

無論親戚朋友或同事一聽到長測H-1的消息都聞風而至，姨丈說要搬屋幫手運貨，同事建議到上水天平山騎越野單車，大家無非看中那個又高又深、載重達1.1噸的尾艙。經實地測試，這台車不僅可鯨吞半間屋的雜物，就連桌椅都放得落；只要繫上索帶，同時擺放六至七台山地越野單車也沒問題，車廂座位空間充足，六個大隻佬都坐得舒舒服服，雙趟門亦方便上落，個個俾滿分！
結果三日兩夜走了數百公里路，車頭那副2.5公升CRDi柴油引擎不但無投訴，配合五前速棍波，170匹馬力來得更快更直接，3,000轉更感到明顯推背感。雖然廠方建議1波起步，但直接以2波開車也不會出現「打冷震」的尷尬情況，基本上單以2、3波已足以應付高速公路或橫街窄巷。自動波及棍波版本相差約三萬元，若是我當然會選棍波版，慳來的錢用來幫愛車度身改造不是更好嗎？