衞冕身份壓力認真大，好似上季美職聯總冠軍洛杉磯銀河同日聯冠軍柏雷素爾，喺聯賽開鑼首戰都失威，加上多蒙特、波圖、里爾等上季冠軍都喺呢個周末失分，真係冠軍球隊災難日。
銀河有碧咸（圖右）、當路雲同羅比堅尼踢正選，上周六美職聯開鑼戰主場對皇家鹽湖城，71分鐘由艾臣布度先開紀錄，以為3分穩陣，點知最後倒輸1:3，爆出40倍冷門波膽；周日日本311大地震一周年，衞冕嘅柏雷素爾雖然3度領先，不過橫濱水手韌力夠，中場谷口博之90分鐘建功，追成3:3平手。
其實歐洲聯賽上周六有唔少衞冕冠軍都失分，德甲嘅多蒙特作客僅和0:0，而同日拜仁慕尼黑就狂炒賀芬咸七個一皮，搞到多蒙特家只領先5分；法甲雙里大戰，里昂主場2:1擊敗上季冠軍里爾，里爾教練魯迪加西亞仲灰到話已衞冕失敗；葡超嘅波圖亦僅逼和科英布拉大學1:1。