散戶普遍「畏高」，好怕炒創新高股份，驚自己會接火棒。不過，仔細分析，散戶唔敢上車，但股價越升越有，定當係大戶所為；再者，能夠逆市創新高，一係業績超靚，一係估值極平，如果兩者兼備，自然係上上之選，今日推介的寶光實業（084）正是表表者。
寶光主打「時間廊」及「眼鏡88」品牌，深入民心，去年的「鐵達時」廣告更喚起市民的集體回憶，堪稱一絕！股價由去年10月低位反彈1.4倍，上周五創1.82元上市新高，收報1.77元，破關再上已無懸念。何解？9字概括：業績勁、估值平、潛力大。
先講業績，上半年度（截至去年9月）發盈喜，純利升1.3倍至1.15億銀，營業額15.9億，毛利率60%；第三季營業額9億，增長21%。假設第四季表現相若，全年營業額34億元，按年升26%，純利2.45億元，增長88%。與09年賺2463萬元比較，兩年間純利升了9倍，驚人到極！
不過，論估值，寶光仍然平得離譜，預測PE得6.9倍，股息4厘，跟東方表行（398）、亨得利（3389）預測PE達10幾20倍，根本冇得比。再者，寶光內地業務可望轉盈，現價並未反映此因素，以10倍PE作目標，寶光可見2.60元，現價買上升水位47%！
魏力