大搞連串改革嘅港交所（388）行政總裁李小加，噚日禮拜日都乖乖返工，就係為咗公佈佢哋個結算所徵收按金諮詢結果。李總裁一到場就即刻大講唔好意思，話要麻煩各位記者星期日都碌過嚟；其實華華同班行家經常都星期日返工，所以覺得麻煩嘅應該唔係記者喇！
「齊心就拆得掂」
唔知李總裁噚日係咪講到唔捨得走，明明答完問題，人都離開咗幾分鐘，突然又殺番入會議室，話有嘢唔記得講。李總裁忽然好感慨咁話，近日可能好多人覺得中港政局好混亂，不過當香港人知道乜嘢係啱嘅時候，通常都好齊心，最後都會拆得掂，叫大家唔使擔心。
華華聽完靜咗幾秒，李總裁無啦啦爆響口講政局？有乜嘢微言大義呢？大家即刻打蛇隨棍上，問李總裁對特首選舉有乜睇法，點知佢即刻縮沙，叫記者唔好害佢。吓？乜唔係你自己想講咋咩？