特首選舉呢場泥漿摔角，仍未知鹿死誰手，一眾地產代理就爭取喺選舉前向未來特首申寃。七個商會喺嚟緊呢個禮拜五（16日）開論壇，爭取修訂過去一年多個打擊樓價嘅措施。呢排特首候選人要為大推黑材料解畫，邊有時間聽佢哋訴苦吖。
地產代理呻難撈
七間地產代理商會早前已發表代理之苦嘅聲明，話實施額外印花稅嚴重打擊成交，搞到佢哋冇啖好食，舊年有300家地產代理行倒閉，造成二千幾人失業。佢哋又要求地產代理監管局減牌費同呼籲局方慳家，唔好租貴總部，同地產代理一齊共度時艱。
而當日論壇主題仲會圍繞新特首應全面檢討壓抑樓市措施。呢個月樓市回暖，二手成交回升，營運環境較去年底改善咗好多，可能係擔心小陽春後繼無力，所以商會希望早發聲，早得救。可惜嘅係，三位特首候選人都幾難聽到佢哋告狀，皆因出席者只有立法會議員同業界代表。