金融界女強人B約吃午飯，一個月前已預約，但臨到約會前一個星期，大家先至互相詢問：「食乜嘢，去邊度？」女強人B仲忙過左丁山，佢話中環餐廳好難訂位，叫左丁山去搞掂，免佢麻煩。諗咗一輪，有米芝蓮星嘅置地文華Amber唔係熱門地點，易訂過8?好多。秘書打電話去，即刻卜咗，但竟然話明遲到十五分鐘就恕不保證有枱，都算巴閉咯。
此日不敢怠慢，十二時四十五分準時去到，金融B已經在座，話明二時十分要去開會，至緊要上菜要快，咁就食商務套餐囉，一早搞定，唔會甩拖嘅。金融B話最近要飛北京上海巴黎，本地事務又多，連星期六都返埋工埋頭苦幹，做到冇氣唞。香港女士能者多勞，在金融界冒起嘅後進，以左丁山接觸得到嘅，起碼有五成以上係女士，男士豈止冇優勢，且逐漸落後㖭，老人家上一輩金融人士之中，女性佔好小比例，依家時代唔同咯，金融B就係佼佼者。
GrantThornton發表調查報告，話香港女性嘅成功率甚高，在合理預期之內，香港勝在崇尚競爭：有能者居之，叻女乘勢而上，唔駛政府推出女性保護政策嚟上位。金融B話上日睇到歐盟有意思立例強制歐盟企業之董事局內，起碼要有四成係女性，令佢心郁郁，點解呀？金融B話：「在香港退休後，可考慮移民歐洲，住在巴黎，專做上市企業嘅INED，做幾間已唔駛為生活費煩惱啦，董事袍金夠日常使費，香港啲退休金就用嚟投資，幾好呀？」一定有INED（獨立非執董）做嘅咩？金融B話：「哎吔，歐洲好多女士唔恨做商界金融界，鍾意冇咁刻板有創意嘅生活，故此大企業係缺乏女董事㗎！歐盟夾硬立法規定四成董事係女性都難搵女董事啫，我有晒資格呀！」咦，係噃，女性，亞洲人（少數族裔），專業人士，金融經驗豐富，曾在倫敦紐約香港打工，係獵頭公司之最佳對象（按：英國有獵頭公司專替大企業物色INED），搵佢一個人坐在董事會，立即增加幾方面評分（一）女權平等，（二）種族多元化，（三）國際化，（四）專業化，（五）證明公司有中國視野！歐盟快啲推出女性董事比例下限嘅規條啦，香港商界女強人可以多一條後路！