【本報訊】「執子之手」此刻已是「與子偕老」，鰜鰈情深40多載的老夫婦，本月初在一班80後義工的協助下，與其他五對長者夫婦披上婚衣，在影樓燈照射下，再次向對方承諾一生一世，拍下人生甜蜜時刻。
「嘩！肚腩咁大！」佻皮新郎給新娘一個熊抱，不忘幽默一番，穿上龍鳳裙褂的新娘嬌嗲甜笑，轉過身給新郎情深一吻。「我頂唔順！」新郎作狀抹走唇印，新娘拍打他「撒嬌」，他們是結婚44載的姚氏夫婦。67歲的姚甲龍跟比他細四年的太太唐益妹都是印尼華僑，當年因印尼排華而逃回國內，住在福建華僑農場，由富家子弟變清貧戶。「朋友介紹，一見佢就好鍾意，因為佢又靚又矮！」姚說68年結婚時兩袖清風，連請人飲茶也困難，「剩係影張證件相，簽個字就算」，有點愧對太太。
「窮要窮得開心，咁多年我都好開心，佢心哋真係好。」姚太握着他的手安慰。兩人婚後育有一子一女，兒子其後來了香港，申請他倆團聚，生活才得到改善。「最慘我有心臟病同糖尿病，00年試過昏迷七日，入咗ICU住15日，跟住要留院四個月，病嗰陣都係佢照顧我。」姚為了補償太太，現在只好言聽計從，「我唔鍾意影相，佢想影結婚相就陪佢囉」！
「我下世都要娶佢」
「最好我先走，我唔畀佢先，我要佢送我一程。」姚太一時語塞，「因為我……(嗚咽)……如果我走，他會送我一程；如果他先走，感覺屋會塌下來。」姚握着太太的手眼泛淚光，吐了一句「人好難講」，只怕太太的心願也未能圓。
「姻緣係天注定，我下世都要娶佢。」75歲的黃旭謙對披嫁衣拍婚照的68歲太太謝惠珍許下承諾。「佢好難搵，又識做嘢，又識講嘢，又慳，又錫細路，下世一定要搵佢！」太太「嘻」一聲笑了出來，但口卻在埋怨︰「我唔嫁你，你乜都唔識做！」
黃生跟太太在廈門認識，67年結婚後誕下一對子女，黃太直言婚後的日子很難捱：「佢喺廣州做嘢，結婚10年分居10年，一年返嚟一個月。佢每個月寄25蚊返嚟，我三個人唔夠用，日頭返工湊細路，晚黑仲要做手工賺外快。」捱了多年，換來的只有一隻戒指，「乜都冇！我送咗隻錶畀佢，又幫佢買衫、被同蚊帳」。在鏡頭前，太太看似滿腔怨言，其實心裏早已被甜蜜填滿。