曾蔭權過去幾個星期被「曾大屋」等一連串醜聞，搞到佢形象清袋。為咗拆彈，佢好罕有咁喺立法會謙卑解畫，仲放棄租住朋友黃楚標喺福田的6500呎大屋。我哋收到風，曾蔭權喺7月1日卸任之後，好大機會走去加拿大暫住。
我哋1月底已率先報道，住慣官大屋的曾蔭權，退任後會到深圳搵屋。至2月底，佢被人揭發接受富豪款待，結果要喺電視台訪問中，自爆租住黃楚標任董事長的深圳東海集團物業，繼而再被傳媒踢爆，大屋面積成6500呎，業主更疑為佢度身訂做豪裝單位。由於有「深圳李嘉誠」之稱的黃楚標，身為香港數碼廣播大股東，煲呔惹來利益輸送的質疑。
有三個細佬照應
曾蔭權最終被迫放棄大屋，要喺7月卸任前另覓居所。以佢每個月大約8萬元長俸，住慣官邸別墅嘅佢又好難喺香港租住番同等物業。根據我哋最新收到的風聲，曾蔭權最近考慮緊去加拿大暫住，主要原因係佢幾個弟弟都在當地定居多年。加拿大的屋大得多，居住環境點都會好過香港，相信亦足夠畀曾太放雜物。既可以避開傳媒，我哋都估計幾符合佢心水，成事機會好高。
曾蔭權是家中的大哥，有五個細佬同妹妹。老二係前警隊一哥曾蔭培，現任新創建（659）執行董事。至於細妹曾璟璇近幾年喺渣打平步青雲，2009升至渣打大中華區主席，去年初又正式接任渣打（香港）董事局主席。
三弟五弟煉油最強
比較少人知道，曾蔭權有三名已經移居美加多年的弟弟。三弟曾蔭煊畢業於加拿大大學。80年代尾同從事煉油科技研究的五弟曾蔭荃喺加拿大創業，公司專門生產煉油用設施。加拿大政府為咗表揚兩兄弟的成就，07年仲頒過卑詩省新加拿大企業家大獎高科技獎畀佢哋。至於四弟曾蔭藩從事學術研究，喺加拿大麥吉爾大學做教授。
曾蔭權2007年競選連任特首時，五名弟妹都專登喺美加、上海返香港支持佢，出席曾蔭權的連任晚會。曾蔭權曾經喺佢本自傳中透露，弟弟曾蔭荃喺佢競選的時候，以電郵鼓勵佢。相信曾蔭權面對今次困難，一眾細佬必定會挺身而出。
煲呔．李明博．卡梅倫
受盡醜聞困擾的曾蔭權喺兩會期間，被記者問到07年豪住澳門豪客專享套房，佢語氣帶點不耐煩表示，是多年前的事。又話純粹是家庭聚會，不想個人生活受到影響。不過，政治人物私事被人監察，係自由民主社會應有之事。
李明博涉避遺產稅
南韓總統李明博最近因為預備退休居所而陷入醜聞。傳媒近日揭露，李明博以兒子李時炯名義，購入塊兩萬幾呎的郊區地皮，興建卸任後的居所。不過，因為當地有土地實名登記制的規定，李明博利用兒子名義登記有犯法之嫌，仲涉嫌避遺產稅。李明博最後要好似Donald咁，放棄住新大屋計劃，改為將舊屋翻新。
至於英國首相卡梅倫，更因為幾年前騎過的一隻馬，搞到一身蟻。有傳媒月前指，他曾經於2008及2010年兩度與英國《世界新聞報》前總編輯的丈夫布魯克斯（Brooks），一同騎過蘇格蘭場退役馬匹Raisa。
英揆騎馬左右言他
梅鐸旗下的英國《世界新聞報》早前因為竊聽風波，招致停刊，卡梅倫早前聘請過《世界新聞報》涉及竊聽的前員工做發言人，外界不止一次質疑卡梅倫與梅鐸的新聞集團過從甚密。
但卡梅倫的發言人，接受傳媒查詢騎馬一事時，一直顧左右而言他，甚至暗示事件芝麻綠豆，不值一提，有卡梅倫老友仲幫佢放風否認。不過，卡梅倫喺事件曝光第三日，終於承認事件，並且就處理得差向公眾道歉。
警方畀布魯克斯寄養退役警馬到其私人農場，原意是讓馬匹安然度過餘生，同時幫政府慳錢，是讓知名人士做的公眾服務。但碰巧卡梅倫2010年騎過Raisa之後，隻馬於同年過身。
根據警方網上指引，任何寄養退役馬匹都唔應該被任何人騎坐，為免馬匹過度操勞。不過，警方事後將規則更正為「CasebyCase」，俾傳媒質疑卡梅倫有冇施壓。有英國傳媒亦批評，只不過是一隻馬，卡梅倫表現得唔嫁又嫁，亦唔一次過公開實情，處理得相當差。
兩名一國之首，都要接受傳媒對自己公私事、個人生活的監察。曾蔭權任內經常自視係政治家，對自己的要求應該要貼近國際標準。