莊士機構（367）齋計末期息，都近4厘，磚頭又重秤，昅昅。莊士去年度（3月底止）每股末期息派3.2仙，計吓數，現價（0.83元）息率已經高達3.8厘，同級磚頭股裏面，莊士呢個息率好吸引。又莊士2012年半年度，純利翻過一番到6.7億銀，兼由去年度中期派息1.8仙，增加到2仙。嚟緊下半年度，莊士有阿仔莊中（298）內房收益Backup，業績繼續肥仔，相信好有機會提高派息。再講，莊士NAV3.8元，現價折讓高達78%，而集團手頭物業包括有山頂、香島道及寶珊道超靚項目，磚頭重秤到不得了。睇到呢個折讓，又係漏晒口水。呢轉莊士喺0.8元上下水位打底，等緊平均線滙合，買定博爆邊，翻半番到1.24元，NAV折讓仲有67%。
數碼信息煲冷灶
中國數碼信息（250）發盈警，業績無嘢睇。但集團現價（3.2仙）嘅NAV折讓，上到67%，有唔錯折讓墊底。再講，個市抖咗一輪，若果發力向上衝，資金一路向下覓食，遲早郁到仙士股。中國數碼冷灶煲一煲，股價一受業績影響，向下插穿3仙兜一轉，博集團上番橫行頂4仙水位，潛在回報率過30%。
錢雋