熱刺真係多得英足總唔少，自從對方證實想搵佢哋主帥哈利列納教英格蘭國家隊，佢哋就輸足咁耐；連埋前晚以0:1敗走愛華頓後，聯賽連輸3場，家陣遠遠落後曼市雙雄曼城同埋曼聯，奪冠賠率仲冷到有成600倍（未計周日戰果），正式脫離爭標行列，3哥之位仲隨時畀阿仙奴搶埋。
阿仙奴步步進逼
熱刺個勢本來唔錯，同1哥曼城嘅距離仲曾經試過只得7分，點知卡比路喺上月初辭去英軍主帥位後，噩夢就開始。英足總證實熱刺領隊哈利列納係其中一個理想選擇，但呢個消息對熱刺就唔多老嚟；前仗作客阿仙奴竟然喺領先2:0之下反輸2:5，上仗迎戰曼聯就輸1:3，搞到佢哋分別落後曼聯及曼城11分同埋13分。
前晚熱刺作客愛華頓，再輸就會脫離爭標行列，點知又出事，俾主隊新簽前鋒謝拉域喺22分鐘一腳射死，最後輸0:1而回。家佢哋俾曼市雙雄放甩，而且只係領先阿仙奴4分；如果兵工廠今晚順利擊退紐卡素，雙方嘅距離就會得番一分。
「處境仍比他隊好」
哈利列納賽後仲嬲爆爆咁話：「我真係想自殺！我哋作客輸畀阿仙奴同愛華頓，主場對曼聯又輸。雖然呢3場波都係硬仗，但係今場同對曼聯嗰場都輸得好唔抵。呢10分（其實係9分至啱）好易就蒸發咗，但我哋嘅處境仍然比其他球隊好，我深信只要繼續努力，仍有機會扭轉戰局。」踢波有時係打道氣，熱刺家陣連輸3場，就算下場英足盃主場對保頓成功反彈，打後都好難好似之前咁，一口氣連贏4場或者6場喇。
熱刺由盛轉衰，但係愛華頓就由衰轉盛。聽日喺打吡戰作客利物浦，仲係拖肥糖主帥莫耶斯領軍10周年紀念，唔知係咪老襯當旺，所以近排球隊亦「弗」到冇朋友，近7仗5勝2和。球迷們，識揀啦！
知多啲：天妒熱刺？
熱刺近年總係畀一啲突如其來嘅事壞其好事。猶記得喺05/06球季，佢哋喺最後一場聯賽作客韋斯咸，只要贏波就可以攞歐聯入場券，但賽前竟然有10個球員食物中毒，中招球員包括現已轉投曼聯嘅卡域克；佢哋班球員喺帶病上陣下，結果輸1:2而回，並且以兩分之微屈居阿仙奴之後排第5位。而喺08/09球季，佢哋季初好似撞咗邪咁，頭8場聯賽竟然錄得2和6負，最終要炒咗西班牙籍主帥拉莫斯，由哈利列納接手先至止跌回升。