為咗加價不惜「與民為敵」嘅中電（002），舊年電費加幅嘅驚嚇度拍得住恐怖片，搞到全城怒吼「你唔好去搶！」喺政黨同政府群插之下，中電先肯讓步，將加幅由9.2%調低到4.9%。以為呢場公關災難告一段落之際，華華又有新發現，原來舊年中電董事會加人工嘅幅度，高過電費多多聲！
CEO勁加兩成
中電啱啱出咗2011年度年報，CEO包立賢嘅加薪幅度一啲都嘢少，總年薪由2010年嘅1670萬元加到舊年嘅2010萬元，加幅足足兩成有多，高過通脹唔在講，真係餐餐食豬肉先有機會食得出咁樣嘅通脹，加幅仲冠絕中電。而執行董事謝伯榮都加8.5%，年薪有成1150萬元。至於主席兼非執行董事米高嘉道理嘅董事薪酬，亦由2010年嘅53.2萬元加到57.4萬元，加咗7.8%。
計晒成個董事會，獨立非執董同非執董整體人工總額都高過2010年成8.2%，淨係董事會袍金都加咗7.8%，總額由37.1萬元加到去40萬元。呢個加幅都比今年公司整體人工加幅5.5%要高噃！
但華華都唔係一竹篙打一船人，負責集團策略嘅執行董事林英偉，人工加幅只有3.7%，但年薪都有成1120萬元，都唔差㗎！
李華華
mailto:[email protected]