同一災區，同樣來自中國，同時開設中華料理餐館，來自香港和廣東的周健良與張志彪，卻好像分別生活在地獄與天堂。災後一年，一個說是最壞的時候，一個說是最好的時候。他們唯一的共通點就是，浩劫來了，仍然死守日本，沒有離棄核輻射與大地震雙重打擊的仙台。
搶修基建人員帶旺消費
「呢度生意比地震前仲好咗。」仙台市購物區國分町中華料理美香園老闆張志彪說。他解釋，過去一年，全國各地開往東北災區搶修基建設施的人員，大多以仙台為中轉站，帶旺了仙台的消費，「佢哋大多數係政府部門派來嘅，使得起錢。」
張志彪自言，美香園是因為禍得福，他還打着經濟學家的腔，說90年代阪神大地震之後，廣泛區域要重建，大興土木，令日本經濟一度復興，這次日本東北大海嘯，相信一樣會因重建而帶動經濟。即使他的分析錯誤，張志彪也矢言不會棄守日本：「我已經入籍咗日本，老婆係日本人，所有身家都投資呢度，甩唔到身㗎喇。」
儘管生意轉旺，但經營成本也因震災上漲了。「因為東北海產供應少咗，啲貨貴咗兩成至一倍，漲價最多係海帶。」張志彪惟有用外國貨補充，包括菲律賓和韓國的海產，「入口貨冇日本本地海產咁靚，但係客人食唔出。」
公司執笠 生意跌幾成
同在仙台市，在寫字樓區經營的「周香港飯店」，生意卻一落千丈。「呢度比震災前淡咗好多，因為好多公司喺地震後搬走咗或者執笠，生意跌咗幾成。」老闆周健良說。周老闆是香港人，仍然持有香港居民身分。去年3月，適逢是周香港飯店開業十周年，卻遇上大海嘯「贈興」，人算不如天算。
飯店最近停業了兩周，更換地板。周老闆說，去年地震後，懷疑大廈水管爆裂滲水，飯店一直被不明來歷的滲水問題困擾，花錢找人來檢查，仍然找不出滲漏來源。花了這麼多心血，堅持守在仙台，周健良這一年來一直內心忐忑：「我都唔知道，留喺度係啱定錯。我最驚日本政府不斷舉債，將來好似希臘咁破產。唉！唔使驚嘅，我又唔係日本人，到時候最多講拜拜囉。」
「周香港」這道招牌，是周健良兩夫婦一起用心血打拼出來的。同是香港人的周太，留守日本的決心比老公更大。「屋企人成日叫我返香港發展，但係我哋花咗好大心血先有今日嘅日子，一下子真係放唔低。」大海嘯快將一周年，周太有感而發的說：「災情總算穩定番落來，其實最緊要一家平安，生意差咗咪差咗囉，又唔係得自己係咁。食得幾多得幾多，做人樂觀啲好。」