人類鬥機械人，電影同遊戲都玩到爛，最新《BinaryDomain》故事雖熟口熟面，但加入創新「語音指令」，戴住Handsfree口噏噏，就可吹雞班馬及向AI同伴落柯打，加上畫面靚音效佳，埋牙肉搏機械敵人時，High到以為拍緊新一集《未來戰士》㖭！
記者：韓繼聰
語音落柯打 擺陣上前殺敵
《BD》以2080年未來世界中的東京為背景，主角帶領嘅小隊，要同各式各樣的機械兵展開激戰。講到明「小隊」，當然唔會俾你單人匹馬做Rambo，合作性便成遊戲重要一環。戴起藍芽Handsfree，便可透過新創「語音指令」，對電腦同伴作出開火、集合、掩護等作戰指令，令你一條友組合出唔同陣營變化，令戰鬥更直接更真實。可能戰場發生在未來東京，成班同伴只識聽「㗎文」，慶幸仍可靠按鍵嚟發號施令，若然嚟緊新版本支援埋英文或中文，咁就更好玩喇。
不過就算你識日文，隊友都未必聽你支笛，事關遊戲強調信賴同團結，要透過你平常對話選擇同行動，而影響彼此信賴度，從而增加佢哋嘅服從性。即係你客客氣氣，同伴自然肯同你賣命；反之你又寸又囂士，又成日推人上前做死士，佢哋梗係睬你都儍。
《人中之龍》江湖大佬亂入
《BD》跟其他着重「爆頭」嘅射擊Game有別，假如你有睇《未來戰士》都知，就算你打爆敵人個頭、射斷埋佢隻腳，佢一樣可以躝過嚟同你糾纏，而你必需針對唔同機械人嘅弱點嚟擊殺，令遊戲難度增高，有機迷甚至抱怨卒仔難打過大佬！《BD》由《人中之龍》班底製作，可見分鏡風格、甚至戰鬥中出現嘅小遊戲，都甚有《人》的影子。最精采係透過單撈追加內容，玩家可用埋神室町猛人秋山駿、真島吾朗等江湖大佬嚟上網組隊參戰，至於最紅主角桐生一馬，就要買日版初回特典先有得單撈喇。世嘉，你好嘢！
《BinaryDomain》
機種：PS3/XB360
類型：TPS
人數：1人（支援網上連線）
售價：$368
