設計大師靳埭強，甚麼大型展覽也參與過，反而迷你展覽卻從沒試過。這次「靳埭強七十後作品展」的展覽作品，是他在七十歲前，為自己七十幅舊作進行的「二次創作」，情況有點像彼思那些幾分鐘長的動畫短片––對他來說，這其實是他對自己下一個十年的預告。
撰文：梁 東
攝影：潘志恆
部份相片提供：HAJIGallery
設計人生
靳埭強，藝術家。42年生於廣東番禺，57年來港，本為裁縫學徒，67年起從事設計。79年獲選「香港十大傑出青年」，91年「香港藝術家年獎之設計師年獎」得主，93年獲日本《IDEA》雜誌選為「全球設計百傑」，99年獲頒銅紫荊星章勳銜，並入選英國二十世紀傑出藝術家及設計師之一。作品被德國慕尼黑州立博物館、漢堡博物館、丹麥哥本哈根裝飾藝術博物館收藏，現為國際平面設計聯盟AGI會員及中國分會主席、康樂及文化事務署藝術顧問及香港藝術館榮譽顧問。
如何入細
「靳埭強七十後作品展」一開始就注定好玩。靳叔第一次來HAJIGallery，是參與一個藝術家的預展，那時畫廊開了約半年，太平山街這個小社區，還是相對隱蔽。「第一次去咁細小嘅畫廊，條街幾隱蔽，覺得呢個舊區有趣，有茶餐廳、工作坊，又有個文化地方，好難得，因為我覺得香港唔係好注重文化，令人擔心。本來都想做多啲展覽，排到期，咁咪做多個，即興囉。以前無咁注意生日㗎，日日都係咁，幾歲咪幾歲囉，但每到十年關口，總會多點思考。70歲都幾難得，不如隆重啲，既可以回顧，又可以展望吓將來。」一般畫廊都得先看作品才定個展方向，這次因為場地關係，變得彈性，靳叔對他70件作品的重新處理，包辦了多種風格，也保留一貫靳氏的語言和思考脈絡。
70前×70後
「靳叔七十後」即是靳埭強在七十歲生日後的首批作品，牆上的作品，各有故事，創作再創作。「其實，有啲展品好簡單，無乜改變，仲係印刷品，因為原作俾人收藏咗。有啲係邀請卡，本來留低一兩張來紀念，我只係再簽個名蓋個章，因為創作過程無得再改變或重來，再感受番創作時候嘅心情。」是意義也是藉口，借助昔日的作品回去跟以前的「埭強」（七十前的作品簽名）一次交手，即是「靳埭強×靳埭強」。好像有一張postcard只用了兩個色，「好便宜嘅印刷嚟咋，邀請全球設計師參與，送畀露宿者，屋就係home，屋愛我，睇到『LOVE』me嘅感覺，仲有行字寫住『無家者的夢想』，其實唔使改，已經好有意思㗎喇，不如加啲美麗嘅畫意啦，將個心上色，因為graphic係平面，加啲煙落去，唔單止有屋住，仲有飯食喎，哈哈哈，過程就係咁去衍生出來。」
另有一款作品，本身已經皺了，「我覺得再揸皺佢，重寫一次，好有意思，變咗雙重過程。」我提到日本平面設計大師原研哉2000年的著作《RE-DESIGN》，靳叔認為其本來意思「係變晒所有嘢，洗過牌，但idea無變。而這批作品，多數有番舊作嘅痕迹。」或如HAJI的Michaelmichaelmichael所說，靳叔作品更如音樂編曲人的remix作品—保留原調，但風格卻給革新了。又有一批作品，以書法融入水墨，靳叔說，除了他，無人試過。這個系列由一到十，包括「九勢」—寫書法筆桿要直要中，即「中鋒」，但也要八面入鋒，加起來就是「九勢」；還有，畫中的印章是靳叔買回來的，上面寫有「我用我法」四字，這是石濤（清初畫家，原名朱若極）的名句。「我唔學你，你有你做，個個唔同，我用我法。」細心人或許留意到當中的「法」字，左邊三點水被放到右邊去了，靳叔說石濤很頑皮，我認為是反動，具革命性。
符號象徵我自己
閱讀靳叔作品，空間是重要的元素，而松樹同人仔是重要符號，兩者經常出現。「你可以走入去作品裏面，山可以遊覽，好多嘢象徵自己。我成日畫好細嘅松樹，用咗好耐，好欣賞。松樹經常受風受雨，仲有雪壓，有時候從個崖嗰度伸出去爭取陽光，佢個姿勢好有型，我當係我自己，我又係有啲風雨要抵擋，即係你要努力先可以成功㗎嘛！」83年上黃山，再之前上廬山，靳叔才第一次見到雲煙。「以前見到中國畫，覺得雲煙同神仙都係一種幻想，點知原來咁鬼正，之後得到好多靈感畀我畫山水。」原為畫作，靳叔將之裁為明信片，以環保為主題，再創作下每張概念不同，睇你讀到幾多。「畫呢，本來無人嘅，一松樹一山頭，再加個人仔、加個印落去，加個船仔，都係表現條河，但有船就顯出嗰時條河同現在條河，有咗時間性。有時用染污整吓佢，火柴燒吓佢，爛咗再貼番落去，表達要好珍惜樹木，可能將來嘅樹木都只會係盆景。」
睇住膠紙也可以寫詩
靳叔在80年代的個人展覽海報設計，其時開始多思考中國的哲學，並留意中式文化小物，如石頭和尺。靳叔收藏的尺多達400把，中國尺最多，他認為來自不同朝代的尺代表制度變遷，思考可延伸的其他問題至上。「石頭係我去完武夷山睇日出後，去條河度執嘅，好靚。而呢把係你哋把尺，呢個石頭係秤砣，係我，你哋可以秤下我有幾多斤両啦，評價我嘅作品啦，咁嘅意思；仲有，把尺係英國尺，秤砣係中國石頭，即係西方標準我有，中國標準我又有。做埋個T字，TforTaiKeung，我個名。」左邊是環保展覽的作品，一支染了紅色的毛筆，可作蓮花，蓮花出淤泥而不染，比喻清新環境。至於蜻蜓，「好自由咁飛，呢個係道家思想，似是而非，花非花，蝶非蝶，蜻蜓又唔係蜻蜓，係畫，哈哈。」古典來說，就是所謂以物詠情，對事物起了感情，便拿來創作，靳叔做到的，是睇住膠紙也可以寫詩；另一張來自赫爾辛基個人海報展參展作品的再創作，沒有入鏡，但更厲害。原海報用了其特別收藏的黑牛皮膠紙貼四隻角，靳叔將其中一角連膠紙撕下成為新作品，逆時針轉90度，然後成了字母K，「TaiKeung」的「K」。
態度影響創作
靳叔早期發表的作品，帶現代感，就算第一批的水墨，用色頗為「西方」。到70年代始醒覺，眼見大師有自己國家文化，為何自己這邊無？「開始睇好多書，搜羅物件，由民間藝術到文房四寶也有收藏，然後做十多年至搵到自己條路。年輕人要睇古典嘢，唔好淨睇潮流嘢；要睇西方嘢，都要深入嘢—瑞士同英國有咩唔同呢？思想影響人?生活態度，態度影響你嘅創作取向，又或者謙唔謙虛—你睇，我個秤砣咁大，幾塵。」
原作＝再創作
是次展覽也有靳叔原作，但同樣涉及再創作成份。「以前『無山見山』同『無水見水』，兩張畫係一米乘米半，後來印咗海報，呢兩張係postcard，我係複製張畫，但係重新畫過落postcard。你見『無山見山』個『無』字，有變化，但同山字差唔多；『無水見水』個『無』字就變咗『水』字。呢四張畫貴啲，因為係真迹，無複製，同原作意念一樣，不過構圖手法大細尺寸有變化。」靳叔作品向來至少賣一萬，但這次作品展的作品售價卻為歷來最低，他希望把台階設低一點，加上尺寸不大，年輕人不難擁有。同場發售明信片加作品評論文章集，還有來自不同時代、原作為藝術館藏品的海報，收益盈餘歸一年一度舉行的「靳埭強設計獎」，以鼓勵優秀設計師，推動華人文化藝術圈的創作氣氛。
靳埭強七十後作品展
地址：HAJIGallery上環太平山街24號地下
展期：即日起至4月4日
開放時間：2pm-7pm（逢星期二至日）
預約：mailto:[email protected]
