大師兄兼師伯C來電，要左丁山出席日本香港日本文化協會成立五十周年午餐會，不敢不從。香港日本協會由兩位香港大學教授EdmundBlunden與EdwardKirby在1962年創辦，布蘭登教授大名鼎鼎，係英國著名詩人，可能係香港大學一百年來最有名氣嘅大師級教授，佢亦係日本專家，曾獲日皇頒贈三等勳章。
午餐會請日本總領事隈丸優次演講及頒發日本外交褒揚狀俾日本文化協會。午餐之後見到議員C，與佢開玩笑：「選特首咁多是非八卦，係知道你自己出馬好過啦！」議員C大笑：「君子之爭喎，黑材料盡出，如果我一早出馬，以我咁多『好嘢收埋』，可能已經俾人抹黑射箭成為一隻黑箭豬，梁振英、唐英年加埋何俊仁加埋都冇我咁多料呀！」咁講法，佢唔出馬，直情係傳媒記者嘅損失。出到場外，有大批記者追訪，唔係問日本文化協會或日本總領事講中日港關係呢啲大路嘢噃，而係追住問唐英年有冇私生子、商界選委會唔會轉軚，日本總領事講咗乜，無人理會。
行出萬豪酒店，走上香港公園行路返中環，手機響起，係馬主F來電。左丁山即刻問：「有乜貼士俾我呀，你今季好旺，拉頭馬影相已經有三次咯噃！益吓我都好吖！」馬主F大聲講：「唔講馬住，講隻狼先。喂。我做建築時佢都未讀完書，我睇住佢出身入仲量行，佢嘅專業係物業估價，物業顧問嚟㗎，傍住地產商先至搵到肥水，點解佢會話同地產商唔係佢嘅主要客戶羣呀，地產商直情係佢米飯班主啦！」呢樣嘢在中環人人都知，講俾左丁山聽做乜？馬主F話：「我見到佢在電視講話，覺得離譜啲吖嘛！」咁勞氣做乜，馬主F刨吓馬好過啦。
返到公司見股市大跌，不知是何原因，或與中國不再保八有關，秘書送上成堆郵寄過嚟嘅書報，其中一本係《信報月刊》三月號，內裏竟然有城大退休講座教授游漢明一篇文章《從臉相看特首選舉鹿死誰手》，游教授嘅專業係市場學，早知佢花時間鑽研風水紫微，估唔到佢連睇相都識，佢得出嘅結論係唐英年有大富大貴之相，嫌優柔寡斷，梁振英進取自尊強，薄唇主信口開河，亂開期票！《蘋果》訪問過20位風水算命師，14人話唐英年做特首，4人擁梁，今游教授憑相貌推斷又係擁唐，可算另類八卦民調，與鍾庭耀民調對撼！