最鍾意扮鬼扮馬嘅詹瑞文，前晚喺灣仔演藝學院首演《女人之虎之挑剔女皇》舞台劇，周美鳳、組合E-kids成員Tommy同Alan都有捧場，連早前被指欠百萬波數嘅林雪都有送花籃。
今次詹Sir擺咗好多政壇人物上枱，開場前以「曾凸首」造型見記者，仲即席搞咗個金像樣最硬正女主角選舉，他說：「候選人有『郭膚淺』、『葉牛肉怡』同『挑剔女王』等，不過因為『郭膚淺』太膚淺，所以大熱倒灶，都係『挑剔女王』勝出。」開場嗰陣，班觀眾見到曾凸首不停叫囂，詹Sir話：「以為大家會噓我，大家都係噓啦，咁我會安落啲。」
六月再加場
間場時，銀幕播咗近日唐英年嘅改圖照，觀眾拍爛手掌，隨後蝦頭（楊詩敏）同詹Sir以郭膚淺及唐膠年造型出場，其間唐膠年問郭膚淺若再揀另一個男人做老公，會揀邊個？郭膚淺好唔客氣話：「要搵一個真男人，你唔係好男人，成日係又笑唔係又笑，成個傻仔咁，生肖屬龍但又似屬豬，最重要要搵個有膊頭嘅男人！」全場笑到收唔到聲。
詹Sir話今次反應太好，14場都爆晒，所以決定喺六月再加場。
