被指是女版張學潤（NelNel）的模謝芷蕙（Cammi），稍後會與正牌NelNel頂替梁思浩任《怪談．靈搜奇》主持。日前NelNel戴上假髮化身女鬼與Cammi拍宣傳片，二人簡直餅印一樣。相信節目還未出街，觀眾已嚇個半死。
陳冠希的模舊愛謝芷蕙，一直被指貌似時裝設計師張學潤，二人甚至被指有父女相，所以不時孖住接job。至近日二人又以「父女檔」姿態頂替梁思浩，擔任有線節目《怪談．靈搜奇》主持四星期。
呻化妝核突
日前二人為節目拍攝宣傳片，由於Cammi一直被指是女版NelNel，有線遂玩大整蠱安排NelNel反串，要他戴上假髮扮長髮女鬼與Cammi一起演出，結果NelNel反串下，真的跟Cammi似到十足，二人絕對有「母女相」。
最抵死是NelNel拍攝期間還擺出不少陰森恐怖甫士嚇Cammi，鏡頭前NelNel表現專業，但事後他卻大發牢騷說：「有線真係大整蠱兼大細超，要我化個咁核突嘅妝，又要我踎低搞到腳痺，但Cammi就可以化靚妝，輕輕鬆鬆坐喺到拍。」
搶思浩飯碗
有傳二人搶梁思浩飯碗，NelNel和Cammi表示不會理會傳聞，只管做好本份。NelNel說：「我以前都係《怪談》主持，我又出過三本鬼故事書，夠晒資格做主持啦，同埋有啲新鮮感都係好事呀。」Cammi則表示擔心自己拍完《怪談》後精神崩潰：「平時我聽完鬼故事都會瞓唔着，好難想像我一晚睇咁多靈異事件之後會點。」另外，據悉思浩是因檔期問題暫停《怪談》工作，稍後他回歸繼續做主持。撰文：林妃