英國著名當代藝術畫廊TheWhiteCubeGallery上周五登陸香港，喺中環開咗展覽館，首個展覽係英國兩位有名老牌藝術家Gilbert同George以LondonPictures為題嘅作品，展覽日期到5月5日為止，Gilbert同George日前低調嚟咗香港撐場，一向熱愛藝術嘅何超儀仲約埋設計師朱祖兒一齊去朝聖。
據知，超儀最近獲展覽館嘅老闆JayJopling邀請做VIP參觀嗰個展覽館，超儀一連去咗兩日，先後同Gilbert、George同DamienHirst三位藝術家碰面。
索簽名似小粉絲
超儀喺展覽館逐一欣賞藝術品，逗留咗兩粒鐘都唔捨得走，其中一日臨走時仲得到Gilbert同George兩位藝術家送出門口，超儀仲拎咗佢哋嘅畫冊出嚟攞簽名，十足小粉絲咁樣，之後佢珍而重之咁收好啲畫冊。超儀話參觀完展覽獲益良多，佢噚日話：「我欣賞佢哋作品嗰時，啟發咗我好多美學嘅靈感，對我日後搞創作好有幫助。」