志雲大師呢頭話去遊學，點知遊遊吓，遊咗去商業電台做CEO喎。大師呢個舉動，成為2012年其中一件X-file。神探李八方本住「希望同大家搵出更多事實」嘅精神，今日就試圖破解呢個謎。線人冒死向八方爆料，話呢件事，其實同小圈子選舉有關！
話說豬狼之爭幾成定局，隻狼好可能會做特首。之但係城中某富二代女子，都係比較希望唐唐當選，於是乎就向佢密友、商台副主席俞琤求助。於是乎，俞琤咪叫志雲大師出山，諗計為唐唐催谷民望。所以呢，唐太郭妤淺前日上商台接受訪問，又同小儀「相認」，全部都係事出有因。諗諗吓，唔怪得俞琤當日講過，志雲大師「至少會任職至3月25日特首選舉完結」，原來係有玄機。