昨天工作之外最大的掙扎，就是到底要選哪一部戲和盧太去看以慶祝三八婦女節。是《桃姐》還是《鐵娘子》？最後決定文末再揭曉。而這兩天聽到很多女同事都在評論唐太又再挺身救夫。綜合所言，就是毀譽參半，烈女派的當然就是不屑她對於一個如此不濟的老公仍然盡攬，直接啲講就係自貶女性地位，散佈封建餘毒。至於另外的當然就是讚嘆唐太的大方和包容，原來之前佢讚唐生有嘅優點係源出自己。再加上誓保婚姻的姿態，確實贏得愛看大團圓式電視劇結局的女性觀眾支持。男性（包括我）就更加眼泛淚光，下次缺失可以振振有辭：唔行差踏錯又點樣考驗到盧太偉大的愛呢！是役，唐太同煲呔一樣都係贏咗啲婦孺嘅分。
港女任高管 亞太列第三
講開分數，不約而同有兩份針對女性職場表現嘅報告發表。首先有研究指出，港女嘅「成就」指數亞洲排名竟然仲低過好多東南亞國家，而只係與內地同分。呢個分數嘅計算分別由「高等教育」、「就業機會」、「職場參與」、「政商領袖」同埋「企業東主」幾項加總後平均。前兩項港女得分頗高，切切反映高學歷和高就業比例的現象。至於中間一項則稍遜，明顯是因為在職女性要面對照顧家庭的意願和需要。而最後一項，莫說是女性，就算是香港男性創業的比例也是在亞洲地區偏低。
還好，另有一組可以令港女揚眉的調查報告。全球企業高管的女性比例，平均有21%，而香港排名全球第七，前列的當然是那些女權高漲的北歐國家，而在亞太地區亦有第三。數字顯示香港有33%的企業高管由女性出任，雖然藍籌公司在這方面的比例大有不及。點解？中共政府話就話女性頂住半邊天，但係呢啲咪同「民主法治」一樣，得個講字，所以國企當家的又會有幾多女同志！至於我自己間公司，屈指一算原來主營業務嘅管理團隊，着咗一半係女人！而董事會都有成三分之一係女士，你話我又點會唔尊重女人呀！
睇《鐵娘子》 藐窩囊政客
最終我還是挑了《鐵娘子》，因為不是揀特首，所以毋須捧劉華場，而甸妮姐和梅姨恰恰都是盧太所愛，難以取捨。只是這陣子對於含辛茹苦、忍辱負重、順夫從子的傳統女性犧牲角色感覺奄悶，還是看權傾一時的當代女性，起碼可以邊睇邊藐嗰啲窩囊嘅男政客。
遲咗一日，不過都藉文章向獨立自主的婦女致敬！
盧先亞