舊年年底個市一片死寂，市場悲觀，最爆嘅一篇展望報道，莫過於本報訪問「金手指」謝清海嘅愛徒、惠理（806）聯席首席投資總監蘇俊祺（Louis），佢當時話今年股票可能係「今世最平」──前提係歐洲爆煲。
噚日惠理有記者會，Louis都排排坐列席，會後華華第一時間捉住佢問個市點睇，仲買唔買到今世最平嘅股票呢？佢話：「全球央行注資，歐央行推出咗LTRO，意大利同西班牙2至3月嘅債務問題，因為央行出手做得多過預期，所以短期再發生債務危機嘅機會低咗好多。」
驚喜遊戲估大市
華華睇番篇報道，佢話之前已經話出現「今世最平」機會好低，呢個係worstcase最壞情況。
同場謝清海講咗個故事，佢哋公司同事間有個遊戲叫「gameofsurprise」驚喜/嚇遊戲，估大市下一件意想不到嘅事出現，謝清海話一年估中6次就可以發達，但係好明顯估中嘅人少之又少，所以佢哋信奉價值投資，寧願話個市係「擁有權買賣市場」，都唔想話係「股票市場」。睇嚟想買「今世最平」嘅股票，除咗做功課之外，可能真係要問叮噹借部時光機喇！
李華華
mailto:[email protected]