希慎（014）終於由利氏家族成員做番當家，噚日佢哋公佈業績之餘宣佈埋董事變動，由希慎創辦人利孝和二女利蘊蓮坐正執行主席，即日生效。CEO嚴磊輝將會功成身退，「貪玩」嘅佢話要另覓新挑戰！
5月中將會告別希慎嘅嚴磊輝解畫話，兩年前加入希慎，係因為當初銅鑼灣希慎廣場仍然喺設計籌建階段，希望加入幫公司搞活銅鑼灣，認為係一件好玩嘅事。家希慎廣場快將開幕，禮頓中心同希慎道一號已經唔同晒，係時候考慮其他挑戰。佢仲補充，新管理層「冇可能catchup唔到，一山還有一山高」。
現年58歲，來自利氏家族嘅利蘊蓮，係金融界猛人。除咗喺澳洲上市公司KeybridgeCapital非執行主席，亦是國泰（293）等三家公司非執董。利主席話，雖然自己係金融界背景，但亦做過地產，一年前亦已擔任希慎非執行主席，加上公司亦有好好嘅團隊，好似好有信心咁喎。咁有乜大計先？佢話董事局遲啲會同大家公佈㗎啦。