前晚連跑三場飯局，由首場紅籌上市公司業績後簡報會；次場報界老總、樓市炒家、律師；到尾場城中投資界名人及OnCall48小時名醫，話題全部離不開特首爭霸戰，飯腳中也有手握選票人士，大家都熱烈討論，還不時有不為人知的內幕堅料。
最頂癮者，係在次場席上，有位經歷過大起大落、洞悉世情城中大炒家，竟然大膽地把政治家與妓女相提並論，話兩者的共通點，都係鍾意講大話，嗒落有味，同檯飯腳當場笑到反肚。
狼君搞局商場亂鬥
今天聽到一宗駭人聽聞的新聞報道，大概係話有特首候選人竟然話將來要在房委會領匯（823）商場旁邊，興建多一個商場打領匯，攞基層民意亦要合乎邏輯，難道將來諗住唔收租益商戶？為世界製造免費午餐，究竟這是由誰度出來的「屎橋」？
建設和經營商場自己打自己，成本開支由誰支付？難道又是納稅人？真的可怒也！假如這位如意狼君真的成功當選，但願以上種種皆空頭支票加大話，香港納稅人不會願意見到政府叉錯腳踩錯位搞福利社會。一個屋苑沒有擴大，人口未有增加，焉能應付多一個商場？即使屋苑隔離罕有地斬樹讓出地皮，不是應該起多一點居住單位讓無殼蝸牛上樓、縮短輪候公屋時間嗎？
今年1月，領匯CEO於平均價28.5元大手減持公司股份套現近四球，難道閣下早已未卜先知貴寶號將大難臨頭！零息環境下，既然政府披荊斬棘才成功把包袱甩掉，單純的基金持有人只是想買來對冲通脹，雖然好多人仍咬牙切齒覺得領匯上市是錯的，但好肯定上市後的房委會商場，的確係冇以前咁樣衰，更令人有理由懷疑港府係賤賣了資產，起碼曾經益過班洋人細路仔基金飽食遠飛。
養狼狗、咬心口，小基金持有人們，小心領匯有難！
胡孟青
獨立股評人