【記者陳達浩、梁偉權、歐文瀚報道】「見佢係阿爸同鄉我先投資，點知原來係老千！」51歲許先生誤信同鄉，參與集資2,000萬元在廣州南沙興建四星級大酒店，豈料同鄉收錢後去如黃鶴。他與兄長不但損失15萬元，更發現有份做說客的77歲父親失蹤，疑他被騙子利用誘騙同鄉入局，兄弟希望父能及時醒悟及現身。
訛稱集資建酒店
「前年嗰位70歲姓蔡同鄉突然搵阿爸，叫佢幫手搞生意，仲話請阿爸做助理經理。」許回想起來，同鄉老千拋磚引玉，先以招聘職位作餌，再藉機帶同許氏三父子到南沙區萬項沙鎮文化公園後面地盤視察，引他們入局。
當時蔡無提出集資計劃，只叫做地盤雜工的許先生介紹工程公司承接工程：「我原本介紹咗一間，最後傾唔成……家諗返覺得好好彩！」他憶述當日地盤四周貼着「打造全南沙最高級四星酒店」的宣傳標語。其後還帶三父子到珠江一路一幢三層高住宅中，位於二樓的寫字樓：「入面好熱鬧，好多人嚟落標做工程，四周圍又掛滿宣傳圖片同海報。」
回港後蔡不時游說許和兄長投資，「佢話投資一萬蚊，每個月可以攞返三百蚊利息，入場費最少五萬。」後來他得悉父兄分別投資數萬和十萬元後，他於去年三月付五萬元予蔡的公司：「我從來未做過類似嘅投資……如果唔係阿爸介紹一定唔會！」錢是付了，但接下來的兩個月，戶口分毫未進，蔡藉辭外資未到，資金未能調動：「佢仲話如果我無信心，下個月（六月）會連本帶利畀返錢我。」
至少十幾人中招
怎料六月開始蔡已不接來電，其後電話更無法打通，連父親亦不知所終。許追查下，發現蔡在港開設了另一間環保投資開發公司，秘書一欄竟填上其父名字：「我懷疑佢利用阿爸人面廣呃人，最近有同鄉打嚟話被人呃錢，我估至少十幾人中招，加埋超過百萬！」
許先生其後多次到蔡於耀東邨的寓所找人不果，上年冬至許再上門，有保安員爆料指他遲來一步，蔡當日早上剛離開。今年初許追到南沙了解，發現當日蔡的寫字樓已人去樓空，樓下雜貨店老闆表示：「三個月前一晚他們把所有東西搬走了。」公園後的地盤仍是爛地一塊，附近街坊稱該處是爛尾地盤，近十年從未動工。
回港後他再到蔡註冊公司位於鰂魚涌的地址，發現該處只為一間提供秘書服務的商務中心，該中心的陳姓經理雖曾協助聯絡蔡，但同樣不果，許才徹底相信自己墮入騙局，正考慮報警。他不期望可以取回投資款項，只希望父親平安現身。
特稿
疑被利用 父音訊全無
蔡姓老千和許父均為福建晉江人，兩人在內地曾當幹部：「阿爸喺水電工程局做，佢（蔡）就做建築工程。」許先生透露父親跟蔡認識多年，至八十年代來港後才少聯絡。蔡主動搵許父合作，疑吼準他人脈廣，易呃更多同鄉。
許父早年來港曾投身成衣行業，多年來一直刻苦耐勞。怎料到91年，他在大陸投資被騙逾百萬元，最後靠任保安員維生。許氏兄弟則分別在地盤做雜工及從事成衣製作，三父子好不容易才還清債項，估不到這次再受騙。
令許先生最擔心的，是父親自去年7月起一直音訊全無：「阿爸家去咗邊？佢（蔡）帶咗阿爸去邊度？」三父子感情一向不俗，過時過節都會一家人吃飯，但剛過去的農曆年連團年飯也沒吃，許慨嘆「錢冇咗就算喇，家最擔心阿爸畀人利用嚟呃人」！
《蘋果》記者